Թեեւ Գագիկ Խաչատրյանի համար տեսակցությունները բաց են, սակայն վերջինիս հարազատները նրան չեն կարողանում այցելել։ Այս մասին մեզ հետ զրույցում ասաց փաստաբան Երեմ Սարգյանը։ Անդրադառնալով պատճառներին` Սարգսյանի նշեց. «Տեխնիկական որոշ հարցեր կան։ Գագիկ Խաչատրյանը չի կարող խցից սենյակ տեղափոխվել, դեռ պետք է դիմում հասցեագրենք, հասկանանք ինչպես է կարգավորվում հարցը»։

Խոսելով Խաչատրյանի առողջական վիճակի մասին, Երեմ Սարգսյանը նշեց, որ վիճակը շարունակում է մնալ ծանր. «Երկու ամսից ավել է ոտքի վրա չի եղել, ցավերը թույլ չեն տալիս։ Քրեակատարողական հիմնարկում չկան այն հնարավորությունները, որոնք կար ազատության մեջ, երբ բժիշկները, հարազատները խնամում էին, օգնում էին, որ քայլի, որոշակի աշխատանքներ էին տանում, որ բարելավեն իր առողջական վիճակը, իսկ հիմա քրեակատարողական հիմնարկում մեջքի վրա պառկած տարբեր բարդություններ են առաջանում, արդեն մկանների հետ կապված ավելի լուրջ խնդիրներ ունի»։ Նշենք, որ այսօր Գագիկ Խաչատրյանի գործով հերթական դատական նիստն էր ընթանում, նրան պատգարակի վրա դատարան էին բերել։