10 մլն դոլար՝ ԻՀՊԿ ղեկավարների մասին ինֆորմացիայի համար․ ԱՄՆ-ն կանգ չի առնում
Tue, 25 Aug 2026 15:00:53 +0400
ԱՄՆ Պետքարտուղարությունը Rewards for Justice («Արդարադատության համար պարգևատրում») ծրագրի շրջանակներում մինչև 10 միլիոն դոլար պարգևատրում է առաջարկում Իսլամական հեղափոխության պահապանների կորպուսի (ԻՀՊԿ) հինգ բարձրաստիճան ղեկավարների մասին տեղեկատվության համար։
Այդ անձանց թվում են՝ ԻՀՊԿ հրամանատար Ահմադ Վահիդին, «Խաթամ ալ-Անբիա» կենտրոնական հրամանատարության շտաբի պետ Ալի Աբդոլլահին, ԻՀՊԿ ավիատիեզերական ուժերի անօդաչու թռչող սարքերի ստորաբաժանման հրամանատար Սաիդ Աղայանին, ԻՀՊԿ կիբերէլեկտրոնային հրամանատարության ղեկավար Համիդրեզ Լաշգարիանը և ԻՀՊԿ հետախուզական կառույցի ղեկավար Մաջիդ Խադեմին։
«Արդարադատության համար պարգևատրում» պաշտոնական կայքում նշվում է, որ այս անձինք հրամանատարում և ղեկավարում են ԻՀՊԿ տարբեր ստորաբաժանումներ, որոնք, ըստ Վաշինգտոնի, «պլանավորում, կազմակերպում և իրականացնում են ահաբեկչություն ամբողջ աշխարհում»։ Ամերիկյան կողմը հատուկ նշում է, որ նրանց հետ կապված ԻՀՊԿ կառույցները մասնակցել են ԱՄՆ զինվորական անձնակազմի դեմ զինված հարձակումներին և ԱՄՆ կարևորագույն ենթակառուցվածքների դեմ կիբերգործողություններին։
Պետդեպը կոչ է արել համապատասխան տեղեկատվություն ունեցող յուրաքանչյուրին այն տրամադրել ծրագրի անվտանգ ուղիներով։ Ծրագիրը նախկինում մինչև 10 միլիոն դոլար էր առաջարկել Մոջթաբա Խամենեիի, Ալի Ասղար Հիջազիի, Յահյա Ռահիմ Սաֆավիի և Էսկանդար Մոմենիի մասին տեղեկատվության համար։
«Արդարադատության համար պարգևատրում» ծրագիրը գործում է 1984 թվականից և կառավարվում է Պետդեպի դիվանագիտական անվտանգության ծառայության կողմից։ Այն օգտագործվում է ահաբեկչական կազմակերպությունների, դրանց առաջնորդների, ֆինանսական ցանցերի և այլ կազմակերպությունների մասին տեղեկատվություն ստանալու համար, որոնք Վաշինգտոնը համարում է ազգային անվտանգությանը սպառնալիք։