Հանցագործության մասին հաղորդում ներկայացվեց
Wed, 26 Aug 2026 21:32:44 +0400
Հակակոռուպցիոն դատարանի մոտ լրագրողների հետ զրույցում Հայաստանի երկրորդ նախագահ Ռոբերտ Քոչարյանի որդին՝ Լևոն Քոչարյանը, անդրադարձել է իրենց բնակարաններում իրականացված խուզարկություններին՝ հայտարարելով, որ դրանց մասին նախապես տեղեկություն է ունեցել անձամբ Նիկոլ Փաշինյանից։
Քոչարյանի խոսքով՝ ինքը դեռ նախապես տեղյակ էր, որ իրավապահները պատրաստվում են խուզարկություններ իրականացնել։ Նա նշել է, որ այդ մասին տեղեկությունը ստացել է Նիկոլ Փաշինյանի հրապարակային հայտարարություններից, որոնք, ըստ նրա, հնչել են ինչպես նախընտրական շրջանում, այնպես էլ Ազգային ժողովի ամբիոնից։
Լևոն Քոչարյանը նաև հայտարարել է, որ ստեղծված իրավիճակի կապակցությամբ հանցագործության մասին հաղորդում է ներկայացրել՝ իրավապահ մարմիններին կոչ անելով պարզել, թե ինչպես կարող էր երկրի վարչապետը նախապես տեղեկություն ունենալ քրեական գործի շրջանակում նախատեսվող գործողությունների վերաբերյալ։
Միաժամանակ նա հերքել է այն տեղեկությունները, թե խուզարկությունների մասին տվյալները կարող էին իրավապահ համակարգից արտահոսել՝ ընդգծելով, որ իր ունեցած տեղեկության աղբյուրը այլ է։
Խոսելով դատական գործընթացներից՝ Քոչարյանը նշել է, որ արդարադատության հետ կապված մեծ ակնկալիքներ չունի։