Իսլանդիայի քաղաքացիները հանրաքվեի ժամանակ դեմ են արտահայտվել Եվրամիության հետ անդամակցության բանակցությունների վերսկսմանը, հաղորդում է տեղական RUV հեռուստաընկերությունը։

Երկրի կառավարությունը հանրաքվեին ներկայացրել է մեկ հարց. «Պե՞տք է Իսլանդիան վերսկսի անդամակցության բանակցությունները Եվրամիության հետ»։ Վեց ընտրատարածքներից հինգում քվեարկության արդյունքների հաշվարկից հետո ընտրողների 47.2%-ը կողմ է արտահայտվել բանակցությունների վերսկսման առաջարկին, մինչդեռ 52.5%-ը՝ դեմ։

RUV-ն նշում է, որ վերջնական արդյունքները դեռևս հասանելի չեն, սակայն վերջին մնացած ընտրատարածքի արդյունքները բավարար ձայներ չեն տա եվրոպական ինտեգրման կողմնակիցներին։

Ըստ Euronews-ի՝ բանակցությունների վերսկսման տարբերակը սկզբում գերակշռում էր, քանի որ ձայները նախ հաշվարկվել են մայրաքաղաք Ռեյկյավիկում, որտեղ բնակչությունն ավելի դրական վերաբերմունք ունի եվրոպական ինտեգրման նկատմամբ։

Սակայն, Իսլանդիայի հյուսիս-արևմտյան և հարավային գյուղական շրջաններից ստացված տվյալների հանրագումարում, որտեղ քաղաքացիները դեմ են ԵՄ անդամակցությանը, հանրաքվեի արդյունքները փոխվել են։

Հեռուստաալիքը սա անվանում է սպասելի. գյուղական տարածքները ավանդաբար ավելի կասկածամիտ են ԵՄ-ի նկատմամբ՝ ձկնորսության և գյուղատնտեսության վերաբերյալ մտահոգությունների պատճառով։

Իսլանդիայի իշխող կոալիցիան սկզբում խոստացել էր հանրաքվեն անցկացնել մինչև 2027 թվականը, սակայն հետո որոշեց արագացնել գործընթացը «աշխարհաքաղաքական ցնցումների շրջանում», այդ թվում՝ ԱՄՆ-ի կողմից Իսլանդիայի նկատմամբ մաքսատուրքեր սահմանելու որոշման և Դոնալդ Թրամփի կողմից Գրենլանդիան բռնակցելու սպառնալիքների պատճառով։