«Հրապարակ»․ Ախտոյանի ընտանիքը վերադարձել է Մերձավան
Tue, 01 Sep 2026 08:20:16 +0400
Մեր տեղեկություններով՝ օրերս Մերձավան են վերադարձել համայնքից վտարված ՔՊ-ական Մհեր Ախտոյանի եղբոր՝ Դավիթ Ախտոյանի կինն ու երեխաները։ Մեր աղբյուրների փոխանցմամբ՝ նրանք այժմ ապրում են Մերձավանում գտնվող կնոջ հայրական տանը, սակայն տնից գրեթե դուրս չեն գալիս։ Ասացին նաեւ, որ Դավիթ Ախտոյանի կինն առողջական լուրջ խնդիրներ ունի։ Ավելի վաղ «Հրապարակ»-ը գրել էր, որ Մհեր Ախտոյանի մայրը ոստիկանների ուղեկցությամբ այցելել էր Մերձավան, տնից վերցրել հագուստներ ու ոստիկանների ուղեկցությամբ էլ հեռացել։
Հիշեցնենք․ Վալոդյա Գրիգորյանի սպանությունից հետո Մերձավանի բնակիչները պահանջել էին Ախտոյանների ընտանիքին եւ նրանց ազգականներին հեռացնել համայնքից։ Ավելի ուշ, զգուշանալով վենդետայի շարունակությունից, Ախտոյանների ընտանիքը հեռացրել էին Մերձավանից։ Հիշեցնենք, որ Մերձավանի նախկին վարչական ղեկավար Մհեր Ախտոյանը, որը սպանությանն օժանդակելու մեջ մեղադրվող Նարեկ Օհանյանի քեռորդին է, Հայաստանից հեռացել էր դեռ սպանությունից առաջ եւ մինչ օրս չի վերադարձել Հայաստան:
Ըստ որոշ տեղեկությունների, նա եւ հայրն արտերկրում անհետացել են, մեր աղբյուրներն անգամ ասում են` նրանց «վերացրել են»։ Վալոդյա Գրիգորյանի սպանության գործով երկու մեղադրյալ կա՝ Նարեկ Օհանյանն ու 20-ամյա Գեւորգ Հարությունյանը, որոնց դատավարությունը շարունակվում է։