Օգոստոսի 10-ին Բերդ համայնքի Տավուշ գյուղի մշակույթի տանը տեղի է ունեցել հանրային լսում՝ Ամերիկայի Հայ Ավետարանչական ընկերակցության Հայաստանի մասնաճյուղի կողմից Տավուշ գյուղում «Տավուշ համայնքային զարգացում. բնակելի թաղամասի կառուցում» ծրագրի շրջանակում բնակելի թաղամաս կառուցելու վերաբերյալ: Բերդ համայնքի ղեկավարի տեղակալ, Տավուշ գյուղի նախկին ղեկավար Արթուր Հովհաննիսյանը ներկայացրել է նախաձեռնողի ծանուցումը ստանալուց հետո համայնքապետարանի կողմից «Շրջակա միջավայրի վրա ազդեցության գնահատման եւ փորձաքննության մասին» ՀՀ օրենքով սահմանված կարգով իրականացված գործողությունները: Ծրագրի մանրամասները եւ թաղամասի կառուցման արդյունքում շրջակա միջավայրի վրա ազդեցության գնահատման հաշվետվությունը ներկայացրել է Ամերիկայի Հայ Ավետարանչական ընկերակցության Հայաստանի մասնաճյուղի բնապահպան Ռայա Բաբայանը։ Տավուշի բնակիչները հարցեր են տվել, իրենց մտահոգություններն ու առաջարկությունները ներկայացրել։ Նրանք հետաքրքրվել են բնակելի թաղամասի կառուցման պարագայում խմելու ջրի մատակարարման կազմակերպման եւ առկա ջրային ռեսուրսների հնարավորությունների հարցերով։ Բարձրացված բոլոր հարցերը, կարծիքներն ու առաջարկություններն արձանագրվել են եւ սահմանված կարգով կներկայացվեն Բերդ համայնքի ավագանու քննարկմանը։ Բերդի ավագանու առաջիկա նիստը նշանակված է սեպտեմբերի 8-ին։ Հայտնի չէ՝ ավագանու այդ նիստում ընդգրկված կլինե՞ն Տավուշ գյուղում բնակելի թաղամասի կառուցման հետ կապված խնդիրները։

Ծրագիրը, իհարկե, ողջունելի է, բայց պարզ չէ, թե ինչու է Ամերիկայի Հայ Ավետարանչական ընկերակցության Հայաստանի մասնաճյուղը ծրագրի իրականացման համար ընտրել ոչ թե Բերդ համայնքի սահմանամերձ գյուղերից մեկը, այլ՝ Բերդ քաղաքից մի քանի կմ հեռավորությամբ, հանրապետական նշանակության ավտոճանապարհի վրա գտնվող Տավուշ գյուղը։ 3 տարվա տեւողությամբ ծրագրով նախատեսվում է ստեղծել 8 տներից բաղկացած թաղամաս, 8 ընտանիքների համար հիմնել մինչեւ 0,3 հեկտար մակերեսով ազնվամորու այգիներ, 8 հյուրատնային բիզնես, 8 ջերմատնային տնտեսություն՝ ելակի աճեցման հնարավորությամբ, հացաբուլկեղենի ու հրուշակագործության, հյութերի, կոմպոտների, մուրաբաների արտադրություն, ընդհանուր՝ 30 աշխատատեղ։ Այդ 8 տների մեծ մասը նախատեսված է Արցախից բռնագաղթած մեր հայրենակիցների, մյուսները՝ տեղացիների համար։ Հայտնի չէ, թե որոնք են ծրագրի թիրախային խմբի ընտրության չափանիշները։ Որպես ծրագրի սպասվող վերջնարդյունքներ՝ նշված է. Տավուշ գյուղում ստեղծվում են բնակարանային ապահովման հնարավորություններ՝ համապատասխան կոմունիկացիաներով, ժամանցի ապահովման հնարավորությամբ, վերազինված բուժակ-մանկաբարձական կետով, ստեղծվում են զբոսաշրջային հնարավորություններ, բարեփոխվում է գյուղի եւ համայնքի սոցիալ-տնտեսական կյանքը։ Բայց ծրագրի մեկնարկը 2025 թվականի հունվարն էր, ավարտը՝ 2028 թվականի հունվարը։ Ծրագրի մեկնարկից անցել է 20 ամիս, սակայն դեռ ծրագրի վերաբերյալ Բերդ համայնքի ավագանին որոշում չի կայացրել։ Խնդիր է կառուցվելիք թաղամասի ջրամատակարարումը։ Տավուշ գյուղը խմելու ջրի պակաս ունի, սակայն ավելի շատ՝ որակի ապահովման խնդիր։ Գյուղը սնուցվում է Չինչինից ձգվող առվով, մակերեսային ջրերն անձրեւներից վարարում, պղտորվում են։ Մաքրման կայան գործարկելու անհրաժեշտություն կա։

Բերդ համայնքի ղեկավարի տեղակալ Արթուր Հովհաննիսյանը մեզ հայտնեց, որ Բերդի բնակավայրերը սնուցող խմելու ջրերը մակերեսային են ու ոչ բավարար որակի, այդ պատճառով համայնքապետարանը տեսչական մարմնի կողմից տուգանվում է: