Ինչպես է իտալացի զբոսաշրջիկ կինը աղոթել Ս․ Էջմիածնի Մայր Տաճարում․ գրառում
Tue, 01 Sep 2026 13:23:14 +0400
«Խմբագրի անկուն» ֆեյսբուքյան էջում կարդում ենք․
«Այսօր Մայր տաճարում Պատարագի ժամանակ ինձնից քիչ հեռու մի զբոսաշրջիկ էր կանգնած՝ իտալացի մի կին։ Աշխարհգալոցի ժամանակ հավատացյալներից մեկը մոտեցավ նրան, խունկ տվեց ու հեռացավ։ Կինը սկսեց շփոթված դեսուդեն ընկնել՝ չհասկանալով, թե հիմա ինչ պիտի անի։ Տեսնելով դա՝ մոտեցա նրան և ասացի, որ երբ թափորը մեզ հասնի, խունկը պիտի լցնի սարկավագի տոպրակի մեջ՝ ի նշան աղոթակից լինելու։
Երբ թափորը մոտեցավ, այս կինը հանկարծ հուզվեց… Սկսեց բարձրաձայն մի աղոթք արտասանել՝ ուղղված սուրբ Մարիամ Աստվածածնին։ Երկա՜ր ու անդադար աղոթում էր, համարյա երգում։ Անկեղծ ասած՝ ես էլ այդ պահին հուզվեցի։ Վիթխարի Եվրոպայից, վիթխարի կաթոլիկ աշխարհից Հայ Եկեղեցու խոնարհ նավակում էր հայտնվել մի պատահական զբոսաշրջիկ, և հանկարծ նա այստեղ այդպիսի մի հոգևոր ապրում ունեցավ։
Ակնթարթ էր, իհարկե, բայց իսկապես սրտառուչ մի ակնթարթ, հատկապես այս օրերին՝ կարծես խորհրդանշական ու խոսուն մի դրվագ…»։