Հայաստանը շահագրգռված է Ռուսաստանի Դաշնության հետ հարաբերությունների կարգավորման և խորացման հարցում։ Բիշքեկում ՌԴ նախագահ Վլադիմիր Պուտինի հետ հանդիպման ժամանակ այս մասին հայտարարել է ՀՀ վարչապետ Նիկոլ Փաշինյանը։

«Պարզապես պետք է նաև արձանագրել, որ վերջին տարիներին իրավիճակն ընդհանրապես մեր տարածաշրջանում և Հայաստանի շուրջ փոխվել է։ Եվ մեզ թվում է, որ իրավիճակին պետք է նայել այս տեսանկյունից։ Որովհետև Ռուսաստանի և Հայաստանի հարաբերությունները հակամարտային իրավիճակում այլ իմաստ ունեին։ Իսկ հիմա, երբ տարածաշրջանում խաղաղություն է հաստատվել, մեզ թվում է, որ իրավիճակին արդեն պետք է թարմ հայացքով նայել։ Եվ կարծում եմ՝ դա կնպաստի մեր հարաբերությունների զարգացմանը։ Մենք նկատի ունենք մեր հարաբերությունների խորացումն ու զարգացումը»,– ասել է Փաշինյանը։

Նա նաև նշել է, որ Հայաստանում գործում են բազմաթիվ ռուսական ընկերություններ, որոնք հաջողությամբ աշխատում են, բարձր շահութաբերություն ունեն և հարկեր են վճարում։ Միևնույն ժամանակ, նրա խոսքով, կան նաև ոչ շահութաբեր ընկերություններ, ինչը խնդիր է ոչ միայն Հայաստանի, այլև Ռուսաստանի համար։
«Մենք շատ բարձր ենք գնահատում Ռուսաստանի Դաշնության հետ մեր հարաբերությունները։ Հուսով ենք, որ Ռուսաստանի համար ևս դրանք կարևոր են։ Ե՛վ Ռուսաստանը, և՛ Հայաստանը, և՛ մենք անձամբ պետք է խնամքով վերաբերվենք այդ հարաբերություններին։ Ես և կառավարությունն այդպես ենք վերաբերվում, և հուսով ենք, որ դուք նույնպես», — նշել է Փաշինյանը։

Հիշեցնենք, որ ՌԴ նախագահը հանդիպման ժամանակ անդրադարձել է Հայաստանի` Եվրոպական միությանն անդամակցելու ձգտմանը` նշելով, որ այլ կազմակերպությանն անդամակցելու գործընթաց սկսելու մասին օրենքի ընդունումը նշանակում է ԵԱՏՄ-ից դուրս գալու մասին հայտարարություն։