ԵՄ 11 երկիր պահանջել է դիտարկել արտաքին քաղաքական հարցերում որոշումներ կայացնելու ընթացքում «վետո»-ի իրավունքը վերացնելու հարցը։ Դրա փոխարեն առաջարկում են անցնել «որակյալ մեծամասնության»; Այս մասին հայտնում է Euronews-ը։

Համաձայն հաղորդման՝ Բելգիան, Ավստրիան, Դանիան, Ֆինլանդիան, Ֆրանսիան, Գերմանիան, Լյուքսեմբուրգը, Նիդերլանդները, Ռումինիան, Իսպանիան եւ Շվեդիան այս մասին նամակով դիմել են ԵՄ ղեկավարությանը։ ԶԼՄ-ի տրամադրության տակ հայտնված պաշտոնական նամակում ներկայացված են հինգ սկզբունքներ, որոնք պետք է կիրառել ԵՄ արտաքին քաղաքականության վարման համար։ Դրանք են՝
• պահպանել անկեղծ համագործակցության եւ փոխադարձ համերաշխության սկզբունքները,
• ավելացնել կառուցողական ձեռնպահության կիրառումը՝ «վետո»-ի փոխարեն
• զերծ մնալ արտաքին քաղաքականության ոլորտում այնպիսի որոշումների պարտադրումից անդամ երկրներին, որոնք օրակարգային տվյալ հարցերի հետ էականորեն կապված չեն
• դիտարկել ԵՄ պայմանագրերի հարցում միաձայնության սկզբունքից որակյալ մեծամասնության սկզբունքի անցման հնարավորությունը
• ներկայացնել ծանրակշիռ եւ հիմնավորված պատճառներ՝ նման քայլի արգելափակման համար։

Համաձայն ԵՄ գործող կանոնների, Միության արտաքին քաղաքականությունը խստորեն կանոնակարգվում է միաձայնության սկզբունքով, ինչը նշանակում է, որ անդամ որեւէ երկիր ցանկացած պահի կարող է պարզապես կիրառել «վետո» եւ կապել մյուս 26-ի «ձեռքերը»; Այդ սկզբունքը բազմաթիվ անգամներ կիրառվել է հատկապես Հունգարիայում Վիկտոր Օրբանի վարչապետության տարիներին եւ դա էլ մեծ հաշվով պատճառ է դարձել, որ նման անցման անհրաժեշտություն առաջանա։ Բրյուսելում, նշենք նաեւ, որ բավականին ժամանակ է առաջարկվում է համաձայն ԵՄ պայմանագրի 31-րդ հոդվածի, կիրառել passerelle clause-ը եւ միաձայնության սկզբունքից անցնել որակյալ մեծամասնության սկզբունքին։