Օրերս ձևավորվել է Գագիկ Ծառուկյանի պաշտպանության հանրային կոմիտե, որի կազմում Հայաստանից եւ Սփյուռքից 60 հեղինակավոր անձ է ընդգրկվել։ Հաջորդ օրն իսկ Գագիկ Ծառուկյանը հանդես եկավ հայտարարությամբ` կոչ անելով նախաձեռնությունը վերածել առհասարակ բոլոր քաղաքական բանտարկյալների իրավունքներով զբաղվող մարմնի: Ծառուկյանի խոսնակ Իվետա Տոնոյանը նշել է. «Այս նախաձեռնության հիմքում միայն մեկ անձի պաշտպանությունը չէ։ Մեր գլխավոր նպատակը Հայաստանում մարդու իրավունքների, արդարության և օրենքի գերակայության պաշտպանությունն է։ Մենք համոզված ենք, որ մեր երկրում որևէ քաղաքացի չպետք է ենթարկվի քաղաքական դրդապատճառներով հետապնդումների, հաշվեհարդարի, տնտեսական ունեզրկման կամ իր սեփականության նկատմամբ ապօրինի ոտնձգությունների»։

Ի թիվս այլ հասարակական-քաղաքական, և մշակութային գործիչների նախաձեռնությանն է միացել նաև նախկին պատգամավոր Անի Սամսոնյանը: Մենք մի քանի հարց տվեցինք նրան:

– Նիկոլ Փաշինյանը չի հանդարտվում: Երեքշաբթի երեկոյան էլ Գագիկ Խաչատրյանին խոշտանգելով տարան կալանքի: Ի՞նչ գնահատական կտաք երկրում առկա մթնոլորտին: Դուք միացել եք Գագիկ Ծառուկյանի պաշտպանության հանրային խորհրդին:

– Այո, ես միացել եմ Գագիկ Ծառուկյանի պաշտպանության խորհրդին, որը նաև մյուս քաղբանտարկյալներին է վերաբերում: Այս գործընթացները, որոնք տեղի են ունենում ընդդիմադիր խոշոր դերակատարների շուրջ ես համարում եմ օրինազանցության դրսևորում: Այս ամենը ոչ թե օրինականություն հաստատելու մասին է, այլ` քաղաքական վրեժխնդրության դրսևորում է, իսկ դա ինձ համար խիստ անընդունելի է: Մենք բոլորս գիտենք, թե տարիներ առաջ ինչեր են տեղի ունեցել մեր երկրում, մենք գիտենք, թե ինչպիսի գործողություններ են կատարել քաղաքական դերակատարները տարիներ շարունակ, և ինչպես են ներկայացել հանրությանը, սակայն այդ ամենը մի կողմ թողնելով հասկանում ենք, որ այս ամենը մեկ նպատակ ունի` ապահովել հաց և տեսարաններ ժողովրդի համար, սակայն երբեք ու երբեք չձգտել իրական արդարության: Այն ժամանակ մենք խոսում էինք օրինական միջոցներով թալանը վերադարձնելու մասին, ասում էինք, որ պետության առաջ բոլոր հանցանքներ կատարած անձինք պիտի պատժվեն, սակայն նկատի ունեինք, որ այդ ամենը պետք է լինի ի շահ պետության, այլ ոչ թե ի շահ միայն մեկ քաղաքական ուժի: Երբ «Քաղաքացիական պայմանագիր» կուսակցությանը ձեռնտու է այս կամ այն քաղաքական ուժի հետ այսպես վարվել` վարվում են: Սակայն ինձ որպես Հայաստանի քաղաքացի այս ամենը ձեռնտու չէ, որովհետև այն, ինչ արվում է, արվում է անօրինական միջոցներով:

– Բայց իրենք ասում են` ամեն բան օրենքի սահմաններում է, թալանը պետք է վերադարձնել ժողովրդին:

– Անօրինական միջոցներով մարդկանցից խլում են իրենց ունեցվածքը, անօրինական ձևով մարդկանց արդարադատության առաջ են կանգնեցնում, եթե դա կարելի է արդարադատություն համարել: Այսօր այս ամենը արվում է այս մարդկանց նկատմամբ, վաղը կարող է արվել ցանկացած այլ մարդու նկատմամբ: Այն գործարարները, ովքեր այժմ կանգնած են ՔՊ-ի կողքին պետք է հասկանան, որ չեն խուսափելու այս նույն գործողություններից, եթե ինչ-որ մի պահից իշխանության համար ձեռնտու չեղան: Այս ամենը իրավական պետություն ունենալու հույսը վերջնականապես կտրում է, այդ պատճառով ես միացել եմ այդ խորհրդին: Իշխանության տակտիկան ինձ համար խիստ անընդունելի է:

– Մի իշխանություն, որը 8,5 տարի շարունակ հարկերով, թանկացումներով և բազում այլ միջոցներով կեղեքում է իր քաղաքացիներին, այդքան պարգևավճարներ է ստանում Հայաստանի նման աղքատ երկրի պետական բյուջեից, մի իշխանություն, որի անունը շարունակ կապվում է տարբեր կոռուպցիոն դրսևորումների հետ, ունի՞ բարոյական իրավունք խոսելու անցյալում արված թալանը վերադարձնելու մասին:

– Հայաստանում արդարադատական համակարգ գոյություն չունի, համենայն դեպս այն այնպիսին չէ, ինչպիսին, որ պետք է լիներ 2018 թվականից հետո: Ես ուզում եմ բոլորին հիշեցնել, որ 2018-ին մարդիկ փողոց էին դուրս եկել, հույս ունենալով, որ նոր իշխանությունը կստեղծի իրապես իրավական պետություն, իրավական կառույցներ, և այլն: Մենք տեսանք, որ ոչ միայն դա տեղի չունեցավ, դեռ մի բան էլ արդարադատական համակարգը սկսեց ծառայեցվել քաղաքական նպատակներին: Իրավապահները` ԱԱԾ, Քննչական, Ոստիկանություն, Դատախազություն, դատարաններ, դրանք բոլոր ուղիղ կերպով քաղաքական պատվերներ կատարողներ են դարձել: Ես պատկերացնում եմ, թե ինչպես է իրավապահների դեմքի արտահայտությունը փոխվում, երբ ամեն անգամ մի նոր քաղաքական պատվեր են ստանում: Պարզապես աշխատանքը չկորցնելու համար նրանք լռում են, նաև հետապնդումներից խուսափելու համար: Ի դեպ` Փաշինյանը վերջերս չարաշահելով իր լիազորությունները ասաց, որ ԱԱԾ շենք է մտնելու և համապատասխան գործողություններ է կատարելու: Սա ուղիղ ապացույցն է այն բանի, որ Հայաստանում արդարադատության համակարգ չի գործում: Ինչ վերաբերում է թալանը հետ բերելուն, ապա մենք տեսնում ենք օրինակներ, երբ նախկին ինչ-որ մի թալանչի աջակցում է այս իշխանությանը, և նրանից որևէ թալան վերադարձնելու մտադրություն չկա, բայց նրանք, ովքեր քննադատում են ռեժիմին, հայտնվում են իշխանական մահակի տակ: Ընտրությունից ընտրություն թալանը հետ բերելու պրոպագանդայով մարդկանցից ձայներ են կորզում, ատելության հիմքի վրա իշխանություն են ձևավորում, բայց իրականում այս մարդիկ չեն կարող խոսել արդարության մասին: Այն, ինչ տեղի է ունենում ընդդիմության շուրջ, այնտեղ չպետք է փնտրել արդարություն և օրինականություն: Փաշինյանի իշխանությունից արդարություն սպասելը ռացիոնալ չէ: Նա քաղաքական բեմադրությունների վարպետ է, իսկ նպատակը` քաղաքական վրեժն է, ոչ ավելին: