Հիմա ինչու են 80 մլն եվրո վարկ վերցնում
Thu, 03 Sep 2026 11:37:28 +0400
Հայաստանը նախատեսում է 80 մլն եվրոյի վարկ ներգրավել ՕՊԵԿ-ի Միջազգային զարգացման հիմնադրամից։ ՀՀ կառավարության այսօրվա նիստում հավանության է արժանացել Հայաստանի և հիմնադրամի միջև «Հայաստանի տնտեսական վերափոխման ծրագիր» վարկային համաձայնագիրը հաստատելու մասին նախագահի հրամանագրի նախագիծը։
Վարկային համաձայնագիրը ստորագրվել է 2026 թվականի հուլիսին։ Փաստաթղթով նախատեսվում է ֆինանսավորել Հայաստանում մի շարք տնտեսական և ինստիտուցիոնալ բարեփոխումներ։
Ծրագրի շրջանակում նախատեսվում են փոփոխություններ ներդրումային և մաքսային ոլորտներում, միջոցառումներ՝ տնտեսական մրցակցության պաշտպանության ուղղությամբ, ինչպես նաև թվայնացման և կիբեռանվտանգության զարգացման ծրագրեր։
Բարեփոխումների օրակարգում ներառված են նաև բնապահպանական ուղղություններ։ Մասնավորապես, նախատեսվում է կատարելագործել կլիմայական օրենսդրությունը, բարելավել արտանետումների կառավարման համակարգը և ուժեղացնել օդի որակի վերահսկողությունը։
Վարկի տարեկան տոկոսադրույքը լողացող է։ Ֆինանսավորման մարման ժամկետը սահմանվել է 18 տարի, որից 5 տարին արտոնյալ ժամանակահատված է։ Վարկի մայր գումարի մարումները նախատեսվում է իրականացնել 2031 թվականի հուլիսի 15-ից մինչև 2044 թվականի հունվարի 15-ը։
Համաձայնագրի պայմանների համաձայն՝ Հայաստանին տրամադրվող վարկային միջոցները պետք է ամբողջությամբ օգտագործվեն մինչև 2026 թվականի սեպտեմբերի 30-ը։