Իրավապահ համակարգն ինչո՞ւ է արագ արձագանքում, վարույթներ հարուցում, ձերբակալում տարիներ առաջ կատարված ենթադրյալ իրավախախտումների համար, սակայն չի արձագանքում այժմ կատարվող օրենքի բացահայտ, ակնհայտ խախտումներին։

Օգոստոսի 31-ին Նոյեմ­բեր­յան համայնքի ղեկավար Արսեն Աղաբաբյանը ձերբակալվեց, ապա նույն օրն ազատ արձակվեց` տարիներ առաջ տեղի ունեցած մի գործընթացի համար առաջադրված մեղադրանքի հիմքով: Սակայն իրավապահներն նույն օպերատիվությունը եւ հետեւողականությունը չեն դրսեւորում Նոյեմբերյանի համայնքապետի հասցեին սոցցանցերում տարածվող չստուգված տեղեկատվության, անհիմն մեղադրանքների, մոլորեցնող տեսանյութերի նկատմամբ։ Մասնավորապես, Գերմանիայում բնակվող Գագիկ Թադեւոսյանն ուղիղ եթերում, առանց որեւէ փաստ, փաստաթուղթ կամ հղում ներկայացնելու, Արսեն Աղաբաբյանին մեղադրել է կոռուպցիոն գործունեության մեջ՝ հնչեցնելով նաեւ վիրավորական արտահայտություններ։ Նույն եթերում հայտարարել է նաեւ, թե իբր «թուրքերը» մտնում են նոյեմբերյանցիների տներ, մարդիկ ապրում են վախի ու սարսափի մեջ, ինչը սահմանամերձ համայնքում կարող է անհարկի լարվածություն առաջացնել։

Իսկ «Հանրային լուրեր» անվանումով ֆեյսբուքյան անհայտ էջում տարածվել է արհեստական բանականությամբ պատրաստված կեղծ տեսանյութ, որտեղ իբրեւ թե ինչ-որ դիմակավորված անձինք Արսեն Աղաբաբյանին ձերբակալում են։ Աղաբաբյանը Նոյեմբերյան համայնքը ղեկավարում է 2021-ից։ Մինչ այդ 12 տարի ղեկավարել է Կողբը, այնուհետեւ՝ 2016-ից՝ Կողբը եւ Զորականը։ Նրա կառավարման տարիներին համայնքում իրականացվել են բազմաթիվ ծրագրեր՝ ճանապարհաշինության, ենթակառուցվածքների, լուսավորության, բարեկարգման, կրթության, մշակույթի, սպորտի եւ երիտասարդության ոլորտներում։ Այս աշխատանքների կարեւոր մասը կյանքի է կոչվել պետական եւ միջազգային գործընկերների հետ համագործակցության շնորհիվ։ Վերջին ընտրություններին նա մասնակցել է «Ապրելու երկիր» կուսակցության միջոցով: Այժմ կրկին ՏԻՄ ընտրություններ են կայանալու Նոյեմբերյանում, եւ հասկանալի է, թե ինչ նպատակ ունեն այս վարկաբեկիչ նյութերն ու ճնշումներն Աղաբաբյանի նկատմամբ: