Սեպտեմբերի 9-ին Տավուշի մարզի առաջին ատյանի ընդհանուր իրավասության դատարանի Դիլիջանի նստավայրում նշանակված էր ԱԺ ՔՊ-ական պատգամավոր Գարիկ Սարգսյանն ընդդեմ պահեստազորի գնդապետ Միհրան Մախսուդյանի քաղաքացիական հայցով դատավարության առաջին նիստը։

Հայցի պատճառը Մախսուդյանի՝ մայիսի 4-ին «Հրապարակին» նրա տված հարցազրույցն է, որտեղ վերջինս նշել է․ «Գարիկ Սարգսյանը արտասվում էր՝ ասում էր՝ երեխեք ունեմ, աղաչում էր, որ չտանեմ մարտադաշտ»։ Այս նախադասությունը զայրացրել է նախկին մարզպետ, այժմ պատգամավոր Գարիկ Սարգսյանին եւ նա դիմել է դատարան ու պահանջում է հերքում, ինչպես նաև 6 միլիոն դրամ որպես զրպարտության փոխհատուցում։ Սեպտեմբերի 9-ի նիստը, սակայն, չի կայացել` Մախսուդյանի միջնորդությամբ։

Մ․ Մախսուդյանը մեզ ասաց, որ ինքը ֆինանսական միջոցների բացակայության պատճառով պաշտպան, ներկայացուցիչ չի կարողացել վերցնել, բայց փաստաբան Հովհաննես Խուդոյանի աջակցության շնորհիվ` փաստաբան Ժաննա Հարությունյանը 2 օր առաջ ստանձնել է իր շահերի պաշտպանությունը եւ հիմա ժամանակ են խնդրել, որ նյութերին փաստաբանը ծանոթանա եւ պատշաճ պաշտպանություն ապահովի։ Մ․ Մախսուդյանը հավելեց նաեւ, որ փաստաբան Աննա Մանթաշյանն իրեն վերաբերող քրեական գործով 2 տարի անվճար պաշպանում է իր շահերը, ինչի համար ինքը շնորհակալ է նրան։