Թագաժառանգը երկու անգամ զանգել ու խնդրել է Թրամփին հարվածել․ ի՞նչ է հայտնի
Fri, 11 Sep 2026 12:00:56 +0400
Սաուդյան Արաբիայի թագաժառանգ Մուհամմեդ բին Սալմանը սեպտեմբերի 10-ին երկու անգամ զանգահարել է ԱՄՆ նախագահ Դոնալդ Թրամփին և հորդորել նրան հարձակվել հուսիթների վրա, սակայն ամերիկացի առաջնորդը հրաժարվել է, հաղորդում են Axios-ը և Իսրայելի 12-րդ հեռուստաալիքի թղթակից Բարաք Ռավիդը՝ հղում անելով երկու բարձրաստիճան ամերիկացի պաշտոնյաների։
Այս զրույցները տեղի են ունեցել հուսիթների կողմից ռազմավարական կարևոր նշանակություն ունեցող Բաբ էլ-Մանդեբ նեղուցի ուղղությամբ առաջխաղացման և Կարմիր ծովի հարավում գտնվող Ալ-Մուխա նավահանգստային քաղաքի գրավման ֆոնին։
Բանակցություններին ծանոթ աղբյուրների համաձայն՝ ԱՄՆ բարձրաստիճան զինվորական պաշտոնյաները իրենց սաուդյան գործընկերներին ասել են, որ Թրամփը պնդում է պահպանել ԱՄՆ ռազմական ուշադրությունը Իրանի և Հորմուզի նեղուցի վրա և խուսափել նոր ճակատ բացելուց։
Միևնույն ժամանակ, այլ աղբյուրների համաձայն, ԱՄՆ Կենտրոնական հրամանատարության (CENTCOM) հրամանատար Բրեդ Քուփերը սեպտեմբերի 10-ին այցելել է Սաուդյան Արաբիա՝ շտապ համակարգման հանդիպումների համար։
Հոդվածում ընդգծվում է, որ մինչ Իրանն արդեն խաթարում է Հորմուզի նեղուցով երթևեկությունը, Բաբ էլ-Մանդեբ նեղուցի նկատմամբ հուսիթների վերահսկողությունը կարող է Թեհրանին նոր և հզոր լծակներ տալ ԱՄՆ-ի և Պարսից ծոցում նրա դաշնակիցների նկատմամբ։