Տավուշի մարզպետարանի կայքը հայտարարություն է տարածել՝ Արցախից բռնի տեղահանված եւ պատերազմում զոհված կամ հաշմանդամություն ձեռք բերած զինծառայողների ընտանիքների կանանց համար նախատեսված ծրագրի մեկնարկի` «LinkedIn եւ աշխատանքի որոնում Հայաստանում» դասընթացի 2-րդ խմբի հայտերի ընդունման մասին։ Սեպտեմբերի 29-ին Երեւանում, Կայուն զարգացման հայկական հիմնադրամի գրասենյակում 1,5-2 ժամվա ընթացքում խմբի մասնակից կանանց սովորեցնելու են «կազմել պրոֆեսիոնալ եւ ժամանակակից ինքնակենսագրականներ՝ մրցունակ CV-ներ (հայերեն եւ անգլերեն), ստեղծել թիրախային եւ գրագետ նամակ, ներկայանալի պրոֆիլ եւ գրավել գործատուների ուշադրությունը, գործնական խորհուրդներ են տրվելու՝ աշխատաշուկայում նավարկելու, տեղական աշխատանքի որոնման հարթակներից օգտվելու համար»:

Դասընթացի մասնակիցների տեղերը սահմանափակ են։ Ծրագիրն իրականացվում է Կայուն զարգացման հայկական հիմնադրամի կողմից՝ Սուրբ Սարգիս բարեգործական կազմակերպության եւ Սոցիալական օգնության հայկական միության համաֆինանսավորմամբ: Հետաքրքիր է, թե այս ծրագրի վրա որքան գումար է ծախսվել: Այդ գումարը որպես օգնություն տրամադրեին այդ կանանց՝ օգուտը հաստատ ավելին կլիներ, քան 1,5-2 ժամանոց ինչ-որ դասընթացից։