Երեկ մահացել է Արմավիրի մարզում անմարդկային պայմաններում բնակվող 59-ամյա Հակոբ։ Վերջինս 8-րդ հիվանդանոցում էր՝ ծայրահեղ ծանր վիճակում։ Դեռ հիվանդանոց տեղափոխված ժամանակ բժիշկները նրա ապրելու շանսը շատ ցածր էին գնահատում, քանի որ վերջինս ի թիվս բազմաթիվ առողջական խնդիրների ուներ նաև վերջին փուլում գտնվող գլխի քաղցկեղ։ Նա հիվանդանոցում գտնվելու գրեթե մեկ ամսվա ընթացքում գիտակցություն չի ունեցել։ Ի դեպ տղամարդու տարեց հորը խնայել էին՝ չէին պատմել որդու ծանր վիճակի մասին։ Խնամքի կենտրոնում գտնվող պապիկը ամեն օր որդուց է հարցնում՝ թե որտեղ է, ինչ վիճակում է, երբ կլավանա ու իր մոտ կտեղափոխվի։
Դեռեւս հայտնի չէ՝ ինչպես է կազմակերպվելու տղամարդու հուղարկավորությունը եւ արդյոք արդեն հորը հայտնել են ցավալի լուրը։

Հիշեցնենք, որ օգոեստոսի 14-ին, համացանցը ցնցել է արմավիրցի հոր և որդու մասնակցությամբ կադրերը, որտեղ վերջիններս ծայրահեղ անմխիթար պայմաններում են գտնվում, հյուծված ու սոված։ Տեսանյութում երևում է, որ 59-ամյա տղամարդը գետնին պառկած է, չի կարողանում շարժվել, նստել, անգամ խոսել, իսկ նրա տարեց հայրը խնդրում է, որ օգնեն որդուն, բժիշկ կանչեն։ Նրանց մասին պատմող տեսանյութ էր հրապարակել «Հանուն ձեր ապագայի» ՀԿ-ի համահիմնադիր Արկադի Կիրակոսյանը։