Դենիս Լեյխենի «Գալիք օրը» վեպը միայն քրեական պատմություն չէ՝ համեմված 20-րդ դարասկզբի դեկորացիաներով։ Այն, ըստ գրականագետների, մեծածավալ կտավ է, որտեղ պատկերված է սոցիալական խոր եւ շրջադարձային փոփոխությունների շեմին գտնվող ամերիկյան հասարակությունը։ Վեպում գործողությունները ծավալվում են 1918-19 թվականներին՝ ամերիկյան Բոսթոն քաղաքում։ Միացյալ Նահանգներն ապրում է Առաջին աշխարհամարտի հետեւանքները, իսպանական գրիպը, սոցիալական լարվածության աճն ու ռասայական կոնֆլիկտները, ինչպես նաեւ՝ արմատական քաղաքական շարժումների ժամանակները։ Լեյխենն անդրադարձել է ամերիկյան պատմության, ըստ ամենայնի՝ ամենակարեւոր փուլերից մեկին, երբ գործող հասարակական համակարգը սկսում է ճաքեր տալ։

Բանվորները պահանջում են աշխատավարձերի բարձրացում, աշխատանքային պայմանների բարելավում։ Արհմիությունը դառնում է ավելի ազդեցիկ, իսկ պետությունն ու գործարարները սոցիալական բողոքն ավելի ու ավելի հաճախ են ընկալում որպես սպառնալիք հանրային համակարգին։ Վեպում առանցքային տեղ է գրավում 1919 թվականի Բոսթոնի ոստիկանների գործադուլը։ Պատմական այդ իրական բախումն էլ դառնում է վեպի շարադրանքի հիմնական առանցքը։ Գլխավոր հերոսը Դենի Քոգլինն է, որը ծառայում է ոստիկանությունում եւ հանդիսանում է ազդեցիկ ոստիկան՝ իրավապահ համակարգում։ Նրա անձնական կոնֆլիկտն արտահայտում է ավելի տարողունակ կոնֆլիկտ, որը կապված է ընտանեկան լոյալության, մասնագիտական պարտքի կատարման եւ սոցիալական արդարության զգացողության ձեւավորման հետ։ Դենին ներգրավվում է ոստիկանների արհմիութենական շարժմանը, որը պահանջում էր ոստիկանական ծառայության պայմանների բարելավում։ Դենիի հոր համար այդ ամենն ավանդական հիերարխիկ համակարգի քայքայում էր ու վտանգավոր մարտահրավեր՝ գոյություն ունեցող կարգուսարքի հանդեպ։ Հոր եւ որդու բախման մեջ Լեյխեմը ցույց է տալիս մի ողջ ժամանակաշրջանին հատուկ բախում։ Ավագ սերունդը ձգտում է պահպանել եղած համակարգը, որը գործում է ու դեռ կարող է կենսունակ լինել, իսկ երիտասարդ սերունդը ձգտում է հասնել ավելի լավին՝ փոփոխությունների՝ երբեմն նույնիսկ հեղափոխական մարտահրավերներ նետելու միջոցով։