Մշակույթի բնաջնջումը պատերազմական գործողությունների շարունակություն է
Mon, 14 Sep 2026 11:28:55 +0400
ԱԺ ընդդիմադիր պատգամավոր Աննա Գրիգորյանը խորհրդարանում ունեցած ելույթի ընթացքում անդրադարձել է հայկական մշակութային և պատմական ժառանգության պահպանման խնդրին՝ ընդգծելով, որ դրա դեմ ուղղված գործողությունները ևս պետք է դիտարկել պատերազմի շարունակության համատեքստում։
Նրա խոսքով՝ սահմանին կրակոցների բացակայությունը դեռևս չի նշանակում, որ տարածաշրջանում բոլոր խնդիրներն ու հակամարտության հետևանքները վերացած են։
«Ինչքան էլ ասեք՝ սահմանին կրակոց չկա, հետևաբար խաղաղություն է, մեր մշակույթի բնաջնջումը պատերազմական գործողությունների շարունակություն է», — հայտարարել է Գրիգորյանը։
Պատգամավորը պահանջել է, որպեսզի Հայաստանի իշխանությունները տարբեր մակարդակներով արձագանքեն հայկական մշակութային ժառանգության վերաբերյալ առկա խնդիրներին։
Անդրադառնալով Գանձասարին՝ Աննա Գրիգորյանը շեշտել է դրա հայկական պատկանելությունը և կարևորել պատմական փաստերի անխաթար ներկայացումը։
«Գանձասարը հայկական է ու չպետք է թույլ տալ, որ փաստերը խեղաթյուրվեն», — նշել է նա։
Գրիգորյանը նաև ընդգծել է, որ կայուն խաղաղության հասնելու համար անընդունելի է սեփական պատմական անցյալի և ինքնության ժխտումը։
«Խաղաղություն երբևէ չեն կառուցում՝ սեփական պատմության ուրացման ճանապարհով», — հավելել է ընդդիմադիր պատգամավորը։