Մենք գրել էինք, որ Երեւանի քաղաքապետ Տիգրան Ավինյանը քաղաքային բյուջեի միջոցներն աջ ու ձախ բաշխում է, այս անգամ էլ Հանրային հեռուստաընկերությանը՝ Հ1-ին է 11 միլիոն դրամ հատկացրել։ Գումարը նախատեսված է կինոռեժիսոր Արտավազդ Փելեշյանի հեղինակած ֆիլմերի թվայնացման աշխատանքների իրականացման համար։ Թե որքանով է Երեւանի բյուջեի հաշվին Հանրային հեռուստաընկերության նման ծրագրերի ֆինանսավորումը տեղավորվում քաղաքապետարանի առաջնահերթությունների եւ լիազորությունների շրջանակում, եւ քաղաքապետարանն ինչ կապ ունի Փելեշյանի ֆիլմերի հետ, անհասկանալի է։

Երեւանի բազմաթիվ խնդիրներ՝ փողոցների, բակերի ու հանրային տարածքների բարեկարգումից մինչեւ տրանսպորտային եւ կոմունալ հարցեր, լուծում են պահանջել։ Բնակիչների դիմումներին հաճախ պատասխանում են, որ ֆինանսներ չկան, ամեն ծախս կանոնակարգված է, ավագանին պետք է դրանց համաձայնություն տա, եւ դա պետք է Երեւանի բյուջեով նախատեսված լինի։ Մինչդեռ քաղաքապետարանը 11 միլիոն դրամ է հատկացնում Հ1-ին՝ կինոֆիլմերի թվայնացման համար։ Իհարկե, Արտավազդ Փելեշյանի ֆիլմերի պահպանումն ու թվայնացումը կարեւոր են, բայց մենք մշակույթի եւ կրթության նախարարություն ունենք՝ այդ հարցը ԿԳՄՍՆ տիրույթում է, այլ ոչ թե քաղաքային իշխանությունների։ Եվ արդյո՞ք այդ ծախսը պետք է կատարվի Երեւանի հարկատուների հաշվին ու հենց քաղաքային բյուջեից։ Այստեղ թերեւս կա նաեւ օրենքի հետ կապված խնդիր։ Քաղաքապետարանը պետք է հիմնավորի՝ ինչ պատճառաբանությամբ է այս ծախսը համարվել Երեւանի համար առաջնահերթ, եւ ինչ հանրային շահ է այն սպասարկում։

Երեւանի ավագանու «Մայր Հայաստան» խմբակցության անդամ Գեւորգ Ստեփանյանին «Հրապարակը» հարցրեց` ավագանու որոշմա՞մբ է Ավինյանը որոշել մշակութային քաղաքականությամբ զբաղվել եւ մեր հարկերի հաշվին «աղա տղա երեւալ»: Ստեփանյանը նկատեց. «Ավագանու հերթական նիստի ժամանակ 30 հարցից 28-ը չզեկուցվող էր, հենց այդ չզեկուցվող հարցերի մեջ էլ մտնում էր այդ ամենը` տասնյակ շինթույլտվությունների հետ մեկտեղ: Իրենք չզեկուցվող հարցերի անվան տակ ինչ ուզում են, անում են: Ընդդիմադիր ֆրակցիաները բազմիցս ասել են` զեկուցեք, որպեսզի երեւանցիները տեսնեն, թե իրենց հարկերն ինչի համար են տալիս, սակայն ՔՊ-ն՝ իր կցորդ «Հանրապետություն» կուսակցության հետ մեկտեղ, փակ ու գաղտնի գործողություններ է անում՝, խաբելով երեւանցիներին: Բայց մարդիկ հարկեր են վճարում եւ պետք է իմանան, թե իրենց վճարած ահռելի գումարներն ինչի վրա են վատնում: Իշխանությունն այսօր ունի մեկ խնդիր` երեւանցիներին շեղել տարատեսակ համերգներով ու միջոցառումներով, իսկ Երեւանում բազում թանկացումներ են եւ դեռ նոր թանկացումներ են սպասվում: Ավտոմեքենաներով ու տրանսպորտով Երեւան մուտք գործելը շուտով կարգելեն, մարդկանց հավելյալ ծախսերի մեջ կթաթախեն, կստիպեն, որ մարդիկ կրկնակի վճարեն, իսկ իրենք կշարունակեն մարդկանց հաշվին շռայլություններ կատարել եւ այլն: Ինչ վերաբերում է Հ1-ին միլիոններ տրամադրելուն, ապա սա առաջին դեպքը չէ, Տիգրան Ավինյանն էլի է նման բան արել»: