Մի՛ թռչեք Ռուսաստան․ Կիևը սպառնու՞մ է միջազգային ավիաընկերություններին
Thu, 17 Sep 2026 12:30:27 +0400
Ուկրաինայի արտաքին գործերի նախարարության խոսնակ Գեորգի Տիխին կոչ է արել միջազգային ավիաընկերություններին զերծ մնալ Ռուսաստանի վրայով թռիչքներից՝ նախազգուշացնելով քաղաքացիական ավիացիայի համար վտանգի մասին։
Սեպտեմբերի սկզբին Կիևը նմանատիպ հայտարարություն ևս տարածեց։
«Մենք կրկնում ենք մեր կոչը՝ զգույշ լինել ռուսական երկնքում, քանի որ այն իսկապես անվտանգ չէ», – «Ինտերֆաքս-Ուկրաինա»-ն մեջբերել է Տիխիի խոսքերը։
Նրա պնդմամբ, Մոսկվան չի փակում իր օդային տարածքը՝ չնայած շարունակվող պատերազմին և երկու կողմերի կողմից անօդաչու թռչող սարքերի և հրթիռների կանոնավոր օգտագործմանը, մինչդեռ Ուկրաինան ստանձնել է պատասխանատվություն՝ ավիաընկերություններին զգուշացնել Ռուսաստանի վրայով թռիչքների ռիսկերի մասին։ Տիխին նաև հայտնել է, որ Ռուսաստանի երկնքում ակտիվությունը նվազել է նախորդ կոչից ի վեր։
«Մեր կոչը ICAO-ին հասել է և՛ անդամ պետություններին, և՛ ավիաընկերություններին։ Նրանց պարտականությունն է ուշադրություն դարձնել այս կոչին և կրճատել կամ ամբողջությամբ դադարեցնել Ռուսաստանի երկնքում ողջ գործունեությունը», – ասել է Ուկրաինայի արտաքին գործերի նախարարության խոսնակը։
Սեպտեմբերի 1-ին Ուկրաինայի նախագահ Վլադիմիր Զելենսկին հայտարարեց, որ Ռուսաստանի օդային տարածքը դառնում է «լիովին վտանգավոր» քաղաքացիական ավիացիայի համար։ Նա ավիաընկերություններին և ապահովագրողներին զգուշացրել է ռուսական օդանավակայաններ, հիմնականում՝ Մոսկվայի, Սանկտ Պետերբուրգի և այլ խոշոր քաղաքների օդանավակայաններ թռչելու ռիսկերի մասին: «Ուկրաինան որպես այդպիսին որևէ սպառնալիք չի ներկայացնում քաղաքացիական ավիացիայի համար՝ ոչ մի քաղաքացիական ինքնաթիռ: Պարզապես ռուսական երկնքում կլինեն անօդաչու թռչող սարքեր, ուստի մենք պետք է դա հաշվի առնենք», – գրել է Զելենսկին Telegram-ում։
Դրանից հետո Ուկրաինայի նախագահի գրասենյակի ղեկավար Կիրիլո Բուդանովը նույնպես հայտարարել է, որ Ռուսաստանի օդային տարածքը այլևս անվտանգ չէ: «Սա նոր իրականություն է, որի մասին մենք պաշտոնապես զգուշացնում ենք միջազգային ավիաընկերություններին, ապահովագրողներին և գործընկերներին», – ասել է նա: