Մինչև Տիգրանաշենը պատրաստվում են Տավուշի հատվածում տարածքներ զիջել
Tue, 22 Sep 2026 12:03:22 +0400
ԱԺ «Հայաստան» խմբակցության պատգամավոր Իշխան Սաղաթելյանը խորհրդարանական ճեպազրույցի ընթացքում հայտարարել է, որ իշխանությունները, իր գնահատմամբ, առաջիկայում պատրաստվում են Տավուշի հատվածում ևս տարածքային զիջումների գնալ։
Սաղաթելյանի խոսքով՝ գործընթացը այլևս չի թաքցվում, և իշխանությունների հետագա քայլերը, իր գնահատմամբ, կարող են հասնել մինչև Տիգրանաշեն։
Պատգամավորը հիշեցրել է 2024 թվականին Տավուշում տեղի ունեցած տարածքային փոփոխությունների գործընթացը՝ նշելով, որ այդ ժամանակ հասարակության շրջանում լուրջ հակազդեցություն էր ձևավորվել։ Նրա գնահատմամբ՝ այդ դիմադրությունը, թեև չկարողացավ կանխել գործընթացը, այնուամենայնիվ, կարևոր նշանակություն ունեցավ։
Սաղաթելյանը պնդել է, որ իշխանությունները նման հակազդեցությունը կանխելու նպատակով, իր գնահատմամբ, ճնշումներ են իրականացնում ընդդիմադիր ուժերի և նրանց ներկայացուցիչների նկատմամբ։ Նրա խոսքով՝ նույն համատեքստում պետք է դիտարկել նաև Հայ Յեղափոխական Դաշնակցության և Հայ Առաքելական Եկեղեցու դեմ իշխանությունների գործողությունները։
Ընդդիմադիր պատգամավորը փաստացի պնդում է, որ իշխանության տարբեր քայլեր միտված են հնարավոր տարածքային զիջումների նկատմամբ հանրային դիմադրությունը թուլացնելուն։
«Ակնհայտ է, որ մինչև Տիգրանաշենն՝ այս իշխանությունը պատրաստվում է տարածքների զիջել Տավուշի հատվածում»,- ասել է նա։