Զիջումը կարող է Հայաստանը դնել շրջափակման մեջ
Tue, 22 Sep 2026 13:31:44 +0400
«Ուժեղ Հայաստան» խմբակցության պատգամավոր Մարիաննա Ղահրամանյանը Տիգրանաշենի հարցը կարևորել է ոչ միայն տարածքային, այլև Հայաստանի ազգային անվտանգության համատեքստում։
Նրա խոսքով՝ Տիգրանաշենը գտնվում է Հայաստանի հարավային դարպասի առանցքային հատվածում, իսկ այդ տարածքով անցնող ճանապարհային հաղորդակցություններն ունեն ռազմավարական նշանակություն։
Ղահրամանյանն առանձնացրել է Իրանի հետ կապող ճանապարհը, ինչպես նաև Վայոց Ձորն ու Սյունիքը միմյանց կապող ուղղությունը՝ ընդգծելով դրանց կարևորությունը Հայաստանի արտաքին աշխարհի հետ հաղորդակցության և երկրի անվտանգության տեսանկյունից։
«Տիգրանաշենն առաջին հերթին Հայաստանի անվտանգությունն է՝ շատ լայն իմաստով։ Այն գտնվում է Հայաստանի հարավային դարպասի առանցքային կետում։ Այստեղ է մեզ արտաքին աշխարհի հետ կապող, այդ թվում՝ դեպի Իրան տանող ճանապարհը։ Ռազմավարական նշանակություն ունի նաև Վայոց Ձոր–Սյունիք հատվածը»,- ասել է պատգամավորը։
Նրա գնահատմամբ՝ Տիգրանաշենի հարցում հնարավոր տարածքային զիջումները կարող են լուրջ անվտանգության ռիսկեր առաջացնել Հայաստանի համար։
Ղահրամանյանը նշել է, որ նման զարգացումների դեպքում Սյունիքը կարող է հայտնվել ավելի խոցելի իրավիճակում՝ Հայաստանի մյուս հատվածների հետ հաղորդակցության առումով։
«Այստեղ զիջումների մասին խոսելը նշանակում է Հայաստանը դնել շրջափակման մեջ, վտանգել նրա անվտանգությունն ու մեկուսացնել արտաքին աշխարհից»,- նշել է նա։
Պատգամավորը նաև ընդգծել է, որ «Ուժեղ Հայաստանի» համար Տիգրանաշենի հարցում հիմնական ուղերձը զարգացումն է, ոչ թե հանձնումը: