Տարածաշրջանի երկրներն ավելի շատ կտուժեն, եթե․․․ Իրանը զգուշացնում է
Sun, 27 Sep 2026 16:30:34 +0400
Միացյալ Նահանգները Մերձավոր Արևելքում «հեռու է լավագույն դիրքում լինելուց», և եթե նրանք ռազմական ագրեսիա իրականացնեն, ամբողջ տարածաշրջանը կհայտնվի ավելի մեծ հակամարտության մեջ։ Այս մասին հայտարարել է Իրանի բանակի խոսնակ, գեներալ Մոհամմադ Աքրամինիան։
«Ամերիկացիները հեռու են տարածաշրջանում լավագույն դիրքում լինելուց։ Եթե ԱՄՆ-ի համար ամեն ինչ լավ ընթանար, նրանք չէին փորձի փոխել իրավիճակը», – SNN-ը մեջբերել է ռազմական հրամանատարի խոսքերը։
Նրա խոսքով, Իրանի զինված ուժերը զգալիորեն ավելի լավ են պատրաստված Վաշինգտոնի կողմից հնարավոր հարձակումներին, քան երբևէ. «Մենք բարոյապես և հոգեբանորեն պատրաստված ենք, օպտիմալացրել ենք մեր սարքավորումները և մարտական գործողությունների մեջ մտցրել ենք նոր տեսակի զենքեր և սարքավորումներ»։
«Եթե թշնամին որոշի ագրեսիա իրականացնել, տարածաշրջանը կհայտնվի պատերազմի, անկայունության և բռնության մեջ ավելի խորը, քան նախկինում, և տարածաշրջանի երկրները կտուժեն ավելի շատ», – զգուշացրել է Աքրամինիան։