«Հրապարակ»․ Ցանկացած հայ պիտի այսօր հետախույզի նման ապրի՝ ինչ նկատում է զեկուցի

«Հրապարակ»․ Ցանկացած հայ պիտի այսօր հետախույզի նման ապրի՝ ինչ նկատում է զեկուցի

Sat, 03 Oct 2026 11:45:17 +0400


Ադրբեջանցին հայ կնոջ վրա կրակել է՝ իր երեք երեխաների ներկայությամբ: Շաքի գյուղի վարչական ղեկավար Մանուչարյանն ասում էր․ «Բռնեցին տարան իրավապահները, չեմ կրող ասել կրակել է, թե ուրիշ-կտրող ծակող գործիքով է հարվածել: Մենք որ մտանք դեպքի վայր, արյան հետքեր տեսանք, բայց կնոջ կյանքին վտանգ չի սպառնում»: Ավելի ուշ պատկերն ամբողջացավ՝ սեպտեմբերի 26-ին ադրբեջանցի զինված զինծառայողը փախել է իր զորամասից, Իշխանասարի հատվածում հատել հայ-ադրբեջանական պետական սահմանը, մի քանի օր զենքը ձեռքին թափառել այս տարածքներում։ ՀՀ ԱԱԾ-ն իբրեւ թե սեպտեմբերի 29-ին ադրբեջանական կողմից նման տեղեկություն է ստացել, բայց մինչեւ հոկտեմբերի 1-ը չի կարողացել հայտնաբերել դասալիքին եւ չի էլ զգուշացրել հայ ազգաբնակչությանը, որ զգույշ լինեն, օգնեն հայտնաբերելու զինված հրոսակին։ Սեպտեմբերի 30-ի գիշերը նա մտել է Շաքի գյուղ, բաց դուռ է տեսել՝ մտել մի տուն՝ օգտվելով բնակիչների բացակայությունից: Կերել, խմել հանգստացել։ Հաջորդ օրը տան անդամները եկել են ու նրան հայտնաբերել իրենց տանը. «Կինն ու 3 երեխաները տանը չեն գիշերել, դպրոցից հետո կինը երեխաների հետ տուն է վերադարձել, տեսել ադրբեջանցուն, աղմուկ բարձրացրել, ադրբեջանցին կրակել է կնոջ վրա։ Կինը կարողացել է ինքնապաշտպանության դիմել, դանակով հարված է հասցրել ադրբեջանցուն, որը փախել, թաքնվել է անասնագոմում, որտեղ էլ հայտնաբերել են նրան»,- պատմել է գյուղացիներից մեկը։

Գլխավոր դատախազությունից հայտնել են, որ Ադրբեջանի Հանրապետության քաղաքացի, զինծառայող Նասիմի Մուսաևին, որն ապօրինի մուտք էր գործել Սյունիքի մարզի Սիսիան համայնքի Շաքի բնակավայր, Քրեական օրենսգրքի հինգ հոդվածքով մեղադրանք է առաջադրվել, նրա նկատմամբ կիրառվել է երկամսյա կալանք: Բայց հայ հանրությունը երկու օր է շոկի մեջ է: Նիկոլ Փաշինյանը զօրուգիշեր խաղաղություն է խոստանում, պատրաստվում է հանուն «խաղաղասիրության» Հայաստանից տարածքներ նվիրել Ադրբեջանին, բայց Ադրբեջանը ոչ իր ռազմատենչ քաղաքականությունն է փոխում, ոչ էլ ադրբեջանցիներն են իրենց ատելությունը զսպում հայ ժողովրդի հանդեպ: «Հրապարակը» զրուցել է Սյունիքի նախկին մարզպետ, գնդապետ, ԵԿՄ Սյունիքի մասնաճյուղի ղեկավար Մելիքսեթ Պողոսյանի հետ:

– Ադրբեջանցի զինվորը հանգիստ, առանց որևէ խոչընդոտի մտնում է հայկական գյուղ, կրակում է անօգնական կնոջ ոտքին: Ձեր կարծիքով` սա ինչի՞ արդյունք է, ո՞ւմ թերացումն է, որ թշնամի պետության զինծառայողը կարողանում է դյուրին կերպով մեր տարածք ներխուժել և մահափորձ կատարել:

– Ճիշտն ասած ես էդ հարցով չեմ խորացել, ոչ էլ ուսումնասիրել եմ, ծառայողական քննությունը ամեն բան ցույց կտա, եկեք կյանքից առաջ չընկնենք: Ծառայողական քննությունը կպարզի` նեղե՞լ են ադրբեջանական կողմից՝ դրա համար է անցել սահմանը, թե՞ ինչ ա արել: Ես չեմ ուզում կյանքից առաջ ընկնեմ: Եկեք ավելորդ բաներ չասենք:

– Առաջ չանցնենք, բայց եթե ադրբեջանցի զինվորը մտնում է հայկական տարածք, ներխուժում է բնակելի տուն, կրակում է կնոջ վրա, դա նշանակում է, որ մեր դիրքերն ամուր չեն, պաշտպանված չեն:

– Դիրքերն ամուր են: Տենց բաներ լինելու են, էդքան շփման գիծ ունենք, դա լինելու ա: Ինչքան, որ սահման ունենք, էդքան էլ պրոբլեմներ կան, և իրենց կողմից, և մեր, բայց եկեք կյանքից առաջ չընկնենք, և սպասենք ծառայողական քննությունն իր գնահատականը տա:

– Պրոբլեմն այլ բան է, իսկ երբ թշնամի բանակի զինվորը մտնում է Սյունիքի մարզ, կրակում է անօգնական կնոջ վրա դա այլ բան է: Չե՞ք կարծում, որ սա սովորական պրոբլեմ չէ:

– Բանակը կասի դրա մասին:

– Դուք՝ որպես գնդապետ, զինվորական կենսագրություն ունեցող մարդ, չունե՞ք ասելիք:

– Էդ հատվածում, և տեսախցիկներ կան, և հսկողություն կա: Լեռնային պայմաններ են, որ հարթավայր լիներ, դա այլ հարց: Լեռնային պայմաններում կարան անցնեն սահմանը, ու ոչ մեկը ոչ մի բան չնկատի: Իրանց կողմից էլ մեր կողմից էլ….

– Այսինքն` այսուհետ լեռնային սահմաններում ադրբեջանցիները կարող են հանգիստ ներխուժել Հայաստան, և մարդկանց վրա կրակել: Նման բան առաջին անգամ ենք լսում:

– Մենք էլ կարանք անցնենք, ամեն ինչ անենք, դուրս գանք: Ամեն ինչ էլ կլինի:

– Բայց փաստացի մենք չենք անցնում, ադրբեջանական կողմն է հատում սահմանը:

– Դու կարող ա չես իմանում:

– Դուք ունե՞ք նման տեղեկություն, որ հայկական կողմից հատել են ադրբեջանական սահմանը:

– Մենք անցնենք, թե չանցնենք, դա ոչ իմ խնդիրն ա, ոչ էլ ուրիշի: Կան գաղտնի բաներ, որոնց մասին չենք կարող խոսել:

– Ադրբեջանցին ներխուժել է հայկական գյուղ, ինչո՞ւ գոնե մարդկանց տեղյակ չեն պահել, որպեսզի ուշադիր լինեն, զգոն լինեն:

– Լրիվ տեղյակ են պահել, գյուղ-քաղաք, բոլորն էլ իմացել են, տարբեր ծառայություններ իրենց խնդիրը կատարել են, և ճանապարհներին, և ամենուր:

– Այնքան «լավ» են կատարել, որ հասել է Շաքի ու անօգնական կնոջ վրա է հարձակվել, կրակել է նրա վրա: Մեզ գյուղից հայտնել են, որ մարդիկ, նույնիսկ վարչական ղեկավարը իրազեկված չի եղել:

– Գյուղերին էլ, բոլորին են ընդհանուր հայտարարել են, ցանկացած հայ պիտի այսօր իր առօրյան դասավորի ինչպես հետախույզը, ինչ նկատում են պիտի զեկուցեն: Ամեն ինչ էլ կլինի:

– Բայց նախքան Փաշինյանը իշխանության գալը մարդիկ հետախույզի դեր ստանձնելու կարիք չունեին: Ի դեպ` ադրբեջանցու արարքին ի՞նչ գնահատական կտաք: Սա ի՞նչ արարք է:

– Վատ գնահատական: Ադրբեջանցին մնում ա ադրբեջանցի: Ադրբեջանցին ոչ փոխվել է, ոչ էլ կփոխվի:

– Իսկ այս պայմաններում հնարավո՞ր է խաղաղություն հաստատել Ադրբեջանի հետ:

– Կլինի, ցավդ տանեմ, լրիվն էլ հո մի գաղափարի չեն: Ինչքան զինծառայող կա, ինչքան մարդ կա, էնքան էլ մոտեցում կա: Հո նենց չի, որ ադրբեջանցին լավ կյանքից ա փախել, ու անցել մեր կողմը: Հաստատ նեղել են, որ փախել ա մեր կողմը: Կարող է չփախներ, սատկեր էնտեղ էլ: Ամեն ինչ էլ կինի: Ընտանիքներում ոնց ա՝ տասը հոգի ապրում ա, տասն էլ տարբեր «խարակտերներ» ունեն, բանակ ա չէ՞: Մեր կողմից էլ, նրանց կողմից էլ վատն էլ կա, լավն էլ կա:

– Հիմա ինչպե՞ս պետք է վարվել այդ ադրբեջանցու հետ, որ ճիշտ լինի:

– Պիտի ուժեղ լինենք, պինդ լինենք, և պատմությունից դասեր քաղենք: Ադրբեջանցին չի փոխվել, չի էլ փոխվելու, մենք պիտի միասնական լինենք, ուժեղ բանակ ունենանք, իրար սիրենք ու հարգենք: Գաղտնիության ռեժիմը պահպանենք, մի քիչ դիվանագիտությունը ուժեղացնենք: Սրանք են մեր ապրելու պայմանները: Պիտի բոլորս լինենք սահմանապահ: Սյունիքի գյուղերը սահմանապահ են, պիտի զգոն լինեն, ինչ տեսնում են, արագ պիտի բանակին, ոստիկանությանը տեղեկացնեն:

– Նման դեպքեր կհիշե՞ք, երբ ազերիները Հայաստան են ներխուժել:

– Քելբաջարում եղել է նման դեպք:

– Իսկ Հայաստանի բուն տարածքում, Սյունիքում:

– Էս վերջերս` մի քանի տարի առաջ երկու զինծառայող էին անցել` Նախիջևանից: Բայց տենց չեմ հիշում: Ես կարծում եմ, որ էդ ադրբեջանցուն պիտի դատեն:

© 2026 Secure News Portal

Source: Hraparak

Hraparak.am

Recent Posts

Ու՞մ է տեսնում ՈւԵՖԱ-ն ՖԻՖԱ-ի նախագահի պաշտոնում․ ինտրիգ կա

Ու՞մ է տեսնում ՈւԵՖԱ-ն ՖԻՖԱ-ի նախագահի պաշտոնում․ ինտրիգ կա Tue, 17 Nov 2026 11:30:00 +0400…

4 րոպե ago

Սև ծովում Ադրբեջանի և Թուրքիայի քաղաքացիներով նավ է խորտակվել

Սև ծովում Ադրբեջանի և Թուրքիայի քաղաքացիներով նավ է խորտակվել Tue, 17 Nov 2026 11:23:56 +0400…

10 րոպե ago

Մեր ունեցվածքը խլում են. Ի՞նչ խնդրանքով դիմեցին քաղաքացիները Ղազինյանին

Մեր ունեցվածքը խլում են. Ի՞նչ խնդրանքով դիմեցին քաղաքացիները Ղազինյանին Tue, 17 Nov 2026 11:22:01 +0400…

12 րոպե ago

Ծնողները միաբերան ասել են՝ խնդրում ենք այս մարդուն պահեք․ Ավինյանը՝ երաժշտական դպրոցի տնօրենի մասին

Ծնողները միաբերան ասել են՝ խնդրում ենք այս մարդուն պահեք․ Ավինյանը՝ երաժշտական դպրոցի տնօրենի մասին Tue,…

15 րոպե ago

«Հրապարակ». Էժանագին շոու է՝ հանրության ականջներից լապշաներ կախելու համար

«Հրապարակ». Էժանագին շոու է՝ հանրության ականջներից լապշաներ կախելու համար Tue, 17 Nov 2026 11:15:01 +0400…

19 րոպե ago

Գնացքը գնացել ա, կլինի 1 րոպե թե 5. Դատավոր Բալայանը բարկացավ

Գնացքը գնացել ա, կլինի 1 րոպե թե 5. Դատավոր Բալայանը բարկացավ Tue, 17 Nov 2026…

24 րոպե ago