20 մլն դրամ՝ հերթական միջոցառմանը․ օտարերկրյա հյուրերի ճանապարհածախսը բյուջեից են հոգացել
Sat, 03 Oct 2026 20:15:08 +0400
Ինժեներական քաղաքում հոկտեմբերի 2-ին մեկնարկել է «Հայաստան – Ճարտարագիտական շաբաթ 2026» ամենամյա միջոցառումների շարքը։ Այն այս տարի անցկացվում է «Ֆիզիկական ԱԲ․ ճարտարագիտական բանականությունը իրական աշխարհում» խորագրի ներքո և նվիրված է արհեստական բանականության՝ թվային միջավայրից դեպի ֆիզիկական համակարգեր անցմանը և այդ ուղղությամբ նորարարական տեխնոլոգիական լուծումներին։
Միջոցառման կազմակերպման եւ անցկացման համար Բարձր տեխնոլոգիական արդյունաբերության և արհեստական բանականության նախարարությունը պայմանագիր է կնքել «Ձեռնարկությունների ինկուբատոր» հիմնադրամի տնօրեն Բագրատ Ենգիբարյանի հետ։ Այս մասին տեղեկանում ենք մեկ անձից կատարվող գնումների հարթակից։ Պայմանագրի արժեքը կազմել է 20 մլն դրամ։ Ծախսերի մեջ է ներառված եղել նաեւ օտարերկրյա խոսնակների ճանապարհածախսն ու կացությունը, որի համար հատկացվել է 5 մլն 449 հազար 667 դրամ։ 200 անձի համար նախատեսված սուրճի ու ճաշի ընդմիջման եւ ամփոփիչ հյուրասիրության համար վճարվել է 7 մլն դրամ, լուսանկարահանման եւ տեսանկարահանման համար՝ 600 հազար դրամ, իսկ միջոցառումը կազմակերպող անձնակազմին՝ 2 մլն դրամ, մնացած գումարը բաշխվել է հետեւյալ կերպ՝ 350 հազար դրամ՝ տեխնիկական ապահովման, 525 հազար դրամ՝ տրանսպորտային ծառայության, 742 հազար դրամ՝ տպագրական նյութերին։
Նշենք, որ «Հայաստան – Ճարտարագիտական շաբաթ 2026»-ի պաշտոնական բացման արարողությանը հաջորդել է Engineering Expo-ի մեկնարկը և մարդանման ռոբոտի ցուցադրությունը: Միջոցառումները շարքը կշարունակվի այսօր՝ հոկտեմբերի 3-ին, Ինժեներական քաղաքում, որտեղ կբացվի Ճարտարագիտական ցուցահանդես, կրթական-երիտասարդական գոտի, տեղի կունենան ոլորտային քննարկումներ։ Հոկտեմբերի 4 -ին այն կշարունակվի Վանաձորի տեխնոլոգիական կենտրոնում, որտեղ կկայանան մարզային միջոցառումներ և եզրափակիչ քննարկումներ: