«Ոչ ոքի մոտ խիղճը չի արթնանալու»
Mon, 05 Oct 2026 12:42:53 +0400
Ռոբերտ Քոչարյանի փաստաբան Հովհաննես Խուդոյանը հայտարարել է, որ քաղաքական և իրավական հետապնդումների գործընթացում իրավիճակի փոփոխության հույսով առաջնորդվելը ճիշտ մոտեցում չէ։
Մամուլի ասուլիսի ընթացքում փաստաբանը նշել է, որ եթե գործընթացն ամբողջությամբ իրավական տրամաբանության շրջանակում լիներ, ապա ի սկզբանե չէր լինի ոչ մեղադրանք ներկայացնելու, ոչ էլ խափանման միջոց կիրառելու հիմք։
Խուդոյանի խոսքով՝ Սեդրակ Քոչարյանի կալանքի երկու ամիսը լրանալուց մոտ հինգ օր առաջ վարույթն իրականացնող մարմինը պետք է դատարանին ներկայացնի նոր հիմնավորումներ՝ կալանքի ժամկետը երկարաձգելու անհրաժեշտությունը հիմնավորելու համար։
Փաստաբանը, սակայն, կասկած է հայտնել, որ քննությունը կկարողանա դատարանին ներկայացնել բավարար և համոզիչ նոր փաստարկներ։ Նրա գնահատմամբ՝ արդեն ներկայացված նյութերի որակը, գործի շրջանակում առկա տվյալների սակավությունն ու, իր բնորոշմամբ, գործի «դատարկությունը» հիմք են տալիս նման ենթադրության համար։
Միաժամանակ Խուդոյանը նշել է, որ, իր կարծիքով, վարույթն իրականացնող մարմինը, այնուամենայնիվ, կփորձի կալանքի ժամկետը երկարաձգելու հիմնավորումներ ներկայացնել։
«Ոչ ոքի մոտ մեկ ամսվա ընթացքում խիղճը չի արթնանալու»,- ասել է Ռոբերտ Քոչարյանի փաստաբանը։