Իջեւան համայնքի Գանձաքար գյուղից ամուսիններ Գարիկ Էլլարյանը եւ Արմենուհի Պետրոսյանը դիմել են Իջեւան համայնքի խնամակալության եւ հոգեբարձության մարմին, որպեսզի իրենց ընտանիքում բնակվող, Իջեւան համայնքի ղեկավարի 2026 թ․ սեպտեմբերի 10-ի որոշմամբ առանց ծնողական խնամքի մնացած երեխայի` 2023թ․ ծնված Գարիկ Խլղաթյանի նկատմամբ իրենց խնամակալ ճանաչեն։ Ամուսինները հայտնել են, որ երեխայի մայրը՝ Փամբուխ Խլղաթյանը, եւ իրենց որդին՝ Սերյոժա Գարիկի Էլլարյանը, մոտ 3 տարի ապրել են որպես փաստացի ամուսիններ: 2026 թ․ ապրիլի 15-ին մայրը լքել է երեխային եւ հեռացել տնից` մեկնել է Ռուսաստան: Երեխայի խնամքն ամբողջությամբ արդեն 5 ամսից ավելի իրականացնում են երեխայի պապն ու տատը` Գարիկ Էլլարյանը եւ Արմենուհի Պետրոսյանը: Երեք տարեկան երեխայի ծննդյան իրավական ակտը գրանցվել է այս տարվա աշնանը` 2026 թ․ սեպտեմբերի 8-ին: Իջեւան համայնքի խնամակալության եւ հոգեբարձության մարմինն իրականացրել է երեխայի կյանքի հետազոտություն, նաեւ փաստաթղթերի ուսումնասիրում։ 2026 թ․ սեպտեմբերի 8-ին երեխային՝ Գարիկ Խլղաթյանին, ծննդյան վկայական է տրվել: Սեպտեմբերի 30-ին էլ Իջեւան համայնքի ղեկավարի պարտականությունները կատարող Կարեն Ղալթախչյանը որոշել է ամուսիններ Գարիկ Էլլարյանին եւ Արմենուհի Պետրոսյանին Գարիկ Խլղաթյանի նկատմամբ խնամակալ նշանակել:

Զանգահարեցինք Գարիկ Էլլարյանին` երեխայի պապիկին: Նա ասաց, որ իրենց որդին` Սերյոժան, Ռուսաստանում համացանցով ծանոթացել է Բառնաուլում ընտանիքով ապրող գյումրեցի Փամբուխ Խլղաթյանի հետ, նրանք փաստացի ամուսնացել են, հետո բնակություն հաստատել Գանձաքարում՝ Սերյոժայի ծնողների հետ։ Սակայն զագսով չեն գրանցել իրենց ամուսնությունը, որովհետեւ Փամբուխը դրանից առաջ ամուսնացած է եղել գյումրեցի մի տղայի հետ, նրանից 3 երեխա է ունեցել, հետո նրանց լքել է, սակայն փաստաթղթով չի ամուսնալուծվել: Փամբուխն առաջին ամուսնուց ամուսնալուծվել է 2024-ին։ Գարիկ Էլլարյանը հայտնեց, որ այժմ իր որդին` Սերյոժան, Ռուսաստանում աշխատում է, հայրական տուն գումարներ է ուղարկում։ Գ․ Էլլարյանը հայտնեց, որ Գանձաքար հարս գնացած Փամբուխը գանձաքարցի շատերին է խաբել «Վայլդբերիսով» մեծ զեղչերով ապրանքներ գնելու մասին, դրա վերաբերյալ Քննչական կոմիտեում այժմ գործ է քննվում։ Նա հավելեց, որ 35-ամյա կինն իրենց ընտանիքին էլ 7-8 միլիոն դրամի վնաս է պատճառել։ Գ․ Էլլարյանն ասաց նաեւ, որ առաջիկայում որոշել են թոռնիկի ներկայիս ազգանունը, որը հարսի ազգանունն է, փոխարինել Էլլարյան ազգանվամբ։