«Հրապարակ». ՀԿ-ները հայտարարություն են արել, Իոաննիսյանը դրան չի միացել
Sat, 10 Oct 2026 09:15:14 +0400
11 իրավապաշտպան կառույցներ երեկ համատեղ հայտարարություն տարածեցին` պահանջելով անհապաղ վերացնել Արթուր Դանիելյանի կալանքը եւ դադարեցնել հետապնդումը նրա նկատմամբ: Արթուր Դանիելյանը, հիշեցնենք, համացանցային գրառումների համար է կալանավորվել, նրան խուլիգանություն եւ ԱԱԾ-ին արատավորելու համար են մեղադրում։ Հայտարարության հեղինակները մեղադրանքը համարում են անհամաչափ եւ քաղաքականապես մոտիվացված․ «Մենք՝ քաղաքացիական հասարակության ներքոստորագրյալ կազմակերպություններս, մեր խոր մտահոգությունն ենք հայտնում եւ դատապարտում ենք Հայաստանում արտահայտման ազատության իրավունքի իրացման համար քրեական հետապնդումների շարունակական դրսեւորումները, ինչը համահունչ չէ Հայաստանի Հանրապետության որդեգրած ժողովրդավարացման ուղուն: Քրեական հետապնդման հարուցման հերթական դեպքը վերաբերում է համացանցում արված գրառումների համար Արթուր Դանիելյանի նկատմամբ հարուցված քրեական հետապնդմանը, ինչն առերեւույթ անօրինական, անհամաչափ եւ քաղաքականապես մոտիվացված է: Առավել անօրինական եւ անհամաչափ է նրա նկատմամբ որպես խափանման միջոց երկու ամիս ժամկետով կիրառված կալանավորումը, որն ակնհայտորեն նրա հանրային խոսքը սահմանափակելու եւ նրան պատժելու նպատակ է հետապնդում՝ հատկապես արտաքին աշխարհի հետ շփումների սահմանափակումների կիրառման պայմաններում»:
Հիշեցնենք, որ Արթուր Դանիելյանի նկատմամբ երկամսյա կալանավորման որոշում են կայացրել, նրա հետ տեսակցությունները փակել: Վերոնշյալ հայտարարությանը որոշ իրավապաշտպան ՀԿ-ներ չեն միացել: Դանիել Իոաննիսյանը, որը նախկին իշխանությունների տարիներին ամենաբարձրն էր խոսում խոսքի ազատության եւ ժողովրդավարության մասին, նույնպես չի միացել այս հայտարարությանը: Մենք մի քանի հարց ուղղեցինք նրան:
– 11 ՀԿ համատեղ հայտարարություն է տարածել, քանի որ համարում են, որ անթույլատրելի է գրառման համար անձին կալանավորելը: Դուք չեք միացել այդ հայտարարությանը, ինչո՞ւ:
– Այս պահի դրությամբ մեզ համար անհստակ է եւ անմիարժեք, թե որ հայտարարություններն են մեղադրանքի հիմքում ընկած: Խոսքը որ գրառումների մասին է, դա հայտնի չէ: Ես այդ գրառումներից ոչ մեկին ծանոթ չեմ: Երբ այդ գրառումները կտրամադրեն մեր կազմակերպությանը, մենք կտրամադրենք մեր կազմակերպության իրավաբանին, եւ նա կտա իր կարծիքը: Դրա հիման վրա էլ կձեւավորվի մեր դիրքորոշումը: Քանի դեռ այդ գրառումներին ամբողջ ծավալով ծանոթ չենք, չենք կարող կարծիք արտահայտել:
– 11 ՀԿ նշում է, որ, անկախ գրառումների բովանդակությունից, չի կարելի մարդուն կալանավորել ֆեյսբուքյան գրառման համար, այս նախադեպը համարում են հակաժողովրդավարական:
– Նայած թե որ գրառման համար է խոսքը: Ասել, որ գրառման համար չի կարելի քրեական հետապնդում հարուցել, ինքնին սխալ է: Պարզ է, չէ՞, որ գրառումը կարող է հազար ու մի բան պարունակել: Վաղը ինչ-որ մեկին եթե կալանավորեն` Աբովյան փողոցում խուլիգանություն կատարելու համար, մենք քանի դեռ չենք տեսել՝ ինչ միջադեպ է տեղի ունեցել, չենք կարող գնահատականներ տալ:
– Բայց միջադեպը եւ գրառումը շատ տարբեր բաներ են: Կարող էին գոնե միայն վարույթ նախաձեռնել, արդյո՞ք կարելի է մարդուն կալանավորել գրառման համար եւ տեսակցություններն էլ փակել:
– Այստեղ կա խնդիր. կալանավորումը չեմ կարծում, որ տեղին է, սակայն դրանից ավելի մանրամասն չեմ կարող ասել:
– Իշխանական ու իշխանամերձ շրջանակները Ֆեյսբուքում պարբերաբար սպառնում են, հայհոյում, բռնության եւ ատելության խոսք են տարածում: Ինչո՞ւ նրանց նկատմամբ գործ չի հարուցվում, չեն կալանավորվում:
– Մենք բազմիցս տեսել ենք, որ քննչականը երկակի ստանդարտներ է կիրառում, սակայն կոնկրետ այս դեպքի մասով չեմ կարող ասել: