Ազգային ժողովը հոկտեմբերի 12-ին արտահերթ նիստ է գումարել, որի օրակարգում 2 հարց է ընդգրկված՝ վավերացնել Հայաստանի Հանրապետության և Վերակառուցման և զարգացման միջազգային բանկի միջև «Հայաստանի բնակարանային ապահովման և հիփոթեքային շուկայի զարգացման ծրագիր» ֆինանսական համաձայնագիրը եւ 2025 թվականի սեպտեմբերի 26-ին ստորագրված «Հայաստանի Հանրապետության կառավարության և Կենսաբանական բազմազանության մասին կոնվենցիայի քարտուղարության միջև կողմերի համաժողովի տասնյոթերորդ հանդիպման, որպես Կարթագենյան արձանագրության կողմերի հանդիպում հանդես եկող կողմերի համաժողովի քսաներորդ հանդիպման և որպես Նագոյայի արձանագրության կողմերի հանդիպում հանդես եկող կողմերի համաժողովի վեցերորդ հանդիպման անցկացման վերաբերյալ» համաձայնագիրը։

Վերջին համաձայնագրով նախատեսվում է նաեւ Հայաստանի՝ որպես հյուրընկալող երկիր իրականացվելիք նախնական ծախսերը։ Մասնավորապես խոսքը 2 մլն 166 հազար 855 դոլարի մասին է (ավելի քան 784 մլն դրամ), որից միայն 923 հազար 280 դոլարը քարտուղարության անձնակազմի գործուղման ծախսերն են, իսկ 108 հազար դոլարը՝ միջոցառման անցկացման վայրում ստուգումների։ Հայաստան են ժամանելու նաեւ ՄԱԿ անվտանգության եւ ապահովության վարչության աշխատակիցներ, որոնց փոխարինման ծախսերի համար հատկացվելու է 620 հազար 280 դոլար, իսկ գործուղման համար՝ 110 հազար 140 դոլար։ Նշենք, որ COP 17-ի անցկացման ժամանակահատվածում՝ պահանջվող անձնակազմի նվազագույն թիվը 241 անձն է, որից 40-ը պետք է պատվիրակներին ուղեկցի իրենց հատկացված հատվածներ, 30-ը՝ մուտքի դռան տարածքում զբաղվելու է անվանաքարտերի սկանավորմամբ, 30-ը՝ գրանցումով, եւս 30 անձ հանդիպման վայրում է ծառայություն մատուցելու, 20-ը՝ լրատվական կենտրոնում, եւ այլն։

Սակայն սա COP 17-ի ամբողջ ծախսը չէ: COP17-ի կազմակերպման համար ավելի վաղ հատկացվել էր 93.5 միլիոն դրամ, որով նախատեսված է 74 երկրների պատվիրակների այցի ֆինանսավորումը: Շուրջ 2.6 միլիարդ դրամ (2 640 797.5 հազար դրամ) էլ` կառավարության պահուստային ֆոնդից հատկացվել է կազմակերպչական աշխատանքներին: Ընդհանուր առմամբ հատկացված գումարը կազմում է շուրջ 7.55 միլիոն ԱՄՆ դոլար: