Սաուդյան Արաբիա՞, Հայաստա՞ն, թե՞ «Ինտեր»․ ինչ է ասել Հենրիխ Մխիթարյանը
Mon, 12 Oct 2026 12:15:47 +0400
Հայաստանի ազգային հավաքականի նախկին ավագ, Միլանի «Ինտերի» կիսապաշտպան Հենրիխ Մխիթարյանը չի շտապում որոշում կայացնել իր ֆուտբոլային կարիերայի ապագայի վերաբերյալ։ «Առաջին ալիքի» հետ զրույցում ֆուտբոլիստը խոստովանել է, որ այս փուլում նախընտրում է կենտրոնանալ կարճաժամկետ նպատակների վրա՝ չփորձելով հեռուն գնացող ծրագրեր կազմել։
«Ոչինչ չեմ կարող խոստանալ, որովհետև գտնվում եմ այնպիսի տարիքում, որ չպետք է մեծ պլաններ դնես։ Պետք է ամենօրյա ցիկլով առաջ գնաս, մտածես վաղվա օրվա մասին, որովհետև հեշտ չէ վերականգնվելը, հեշտ չէ նպատակներ դնելը, հեշտ չէ մարզվել այնպես, ինչպես մարզվում են 21-22 տարեկան ֆուտբոլիստները»,- նշել է Մխիթարյանը՝ ընդգծելով, որ շարունակում է փորձել լավագույնս դրսևորել իրեն, սակայն չի կարող ասել, թե դեռ որքան ժամանակ կշարունակի խաղալ։
Անդրադառնալով ապագայում հնարավոր տեղափոխություններին՝ Հայաստանի հավաքականի նախկին ավագը բացառել է Սաուդյան Արաբիա տեղափոխվելու հնարավորությունը։ Միաժամանակ նա ընդգծել է, որ իր կարիերայի ընթացքում երբեք առաջնային չի համարել ֆինանսական գործոնը։
«Ինձ համար երբեք փողը կարևոր չի եղել։ Ես երբեք փողի համար չեմ խաղացել և ակումբից ակումբ չեմ տեղափոխվել։ Տեղափոխվել եմ ակումբներ և ֆուտբոլ խաղացել իմ ամբիցիաների, նպատակների և այն երազանքների համար, որոնք ունեցել եմ մանկուց»,- ասել է ֆուտբոլիստը։
Մխիթարյանի խոսքով՝ շատերը զարմանում են, թե ինչու ինքը չի տեղափոխվում Սաուդյան Արաբիայի առաջնություն կամ ամերիկյան MLS։ Սակայն նրա համար առաջնայինը ոչ թե առաջարկվող պայմաններն են, այլ խաղադաշտ դուրս գալու մոտիվացիան, մրցակցային լարվածությունն ու ֆուտբոլից ստացած էմոցիաները։
«Ինձ համար ամենակարևորն այն է, որ առավոտյան արթնանալիս ունենամ այն մոտիվացիան, այն կրակը, որ շաբաթ կամ կիրակի, երեքշաբթի կամ չորեքշաբթի հանդիպում ունեմ, որը լարվածություն է առաջացնում, և ես զգում եմ այդ ադրենալինը։ Ես չեմ ուզում առավոտյան արթնանալ և մտածել, որ պարզապես գնում եմ աշխատանքի։ Եթե չկա ադրենալին, չկա էմոցիա, դա արդեն ինձ համար դառնում է գործ»,- նշել է Մխիթարյանը։
Առանձին անդրադառնալով Հայաստան հնարավոր վերադարձին՝ ֆուտբոլիստը նշել է, որ այդ տարբերակն այլ բնույթ կունենար։ Նրա խոսքով՝ Հայաստան վերադառնալն ու այստեղ խաղալը բոլորովին այլ իրավիճակ է, սակայն «Ինտերի» նման բարձրակարգ ակումբից անմիջապես հայկական ֆուտբոլ տեղափոխվելը հենց այն պատճառներից է, որոնցով պայմանավորված՝ ինքը ներկայումս չի դիտարկում այդ տարբերակը։
Այսպիսով՝ Մխիթարյանը դեռևս հստակ ժամկետներ չի նշում իր կարիերայի ավարտի կամ հաջորդ քայլի վերաբերյալ։ Նրա խոսքից պարզ է դառնում, որ ապագա որոշումները կախված են լինելու ոչ միայն ֆիզիկական հնարավորություններից, այլև այն հանգամանքից, թե որքանով կպահպանվեն ֆուտբոլի հանդեպ իր մոտիվացիան և մրցակցային ոգին։