Ինչ է սպասվում գազի գնի բարձրացման դեպքում
Tue, 20 Oct 2026 14:37:24 +0400
Գազի գնի հնարավոր բարձրացումն ինչ ազդեցություն կարող է ունենալ Հայաստանի տնտեսության վրա, և արդյոք երկիրը պատրաստ է դիմակայելու այդ փոփոխությանը։ Այս հարցը Ազգային ժողովի ֆինանսավարկային և բյուջետային հարցերի մշտական հանձնաժողովի նիստում բարձրացրել է «Հայաստան» խմբակցության պատգամավոր Մեսրոպ Մանուկյանը՝ դիմելով Կենտրոնական բանկի խորհրդի անդամի պաշտոնում ՔՊ-ի առաջադրած թեկնածու Սևակ Միքայելյանին։
Պատգամավորը ուշադրություն է հրավիրել այն հանգամանքի վրա, որ հունվարի 1-ից գազի գործող սակագնի պահպանումը երաշխավորված չէ։ Նրա խոսքով՝ անհրաժեշտ են բանակցություններ, որոնց արդյունքում պետք է որոշվի՝ գազի գինը կմնա անփոփոխ, թե կվերանայվի։
Ի պատասխան՝ Սևակ Միքայելյանը նշել է, որ հնարավոր թանկացման հետ կապված ռիսկերը հաշվի են առնվել բյուջեի պլանավորման ընթացքում։ Կառավարության գործընկերները նախատեսել են համապատասխան մոտեցումներ՝ հնարավոր գնային փոփոխությունների հետևանքները մեղմելու համար։
Կենտրոնական բանկի տեսանկյունից հիմնական ուշադրությունը պետք է կենտրոնացվի գնաճի վրա հնարավոր ազդեցությունների գնահատման վրա։ Միքայելյանի խոսքով՝ ԿԲ-ն պետք է հետևի տնտեսական զարգացումներին և տոկոսադրույքների վերաբերյալ որոշումներ կայացնելիս հաշվի առնի նաև գազի հնարավոր թանկացման սցենարը։
Նա ընդգծել է, որ Կենտրոնական բանկն իր տրամադրության տակ եղած գործիքների միջոցով պետք է փորձի սահմանափակել գնաճային ռիսկերը՝ թույլ չտալով, որ միջնաժամկետ հատվածում դրանց ազդեցությունը հանգեցնի գնաճի թիրախային միջակայքից շեղումների։