Հայաստանում կառուցվող դատա-կենտրոնը անհանգստացնում է ՌԴ-ին
Fri, 23 Oct 2026 14:15:08 +0400
Ռազմական փորձագետ, վերլուծաբան Ալեքսեյ Լեոնկովը կարծում է, որ Եվրասիական միջկառավարական խորհրդի կողմից Հայաստանի վերաբերյալ ներկայացված զեկույցը ցույց է տալիս իրավիճակի ողջ լրջությունը, որն առկա է Հայաստանի հետ կապված՝ ԵԱՏՄ-ում հնարավոր որոշումների առնչությամբ։ Այս մասին նա խոսել է «Ալֆանյուզի» հետ զրույցում։
«Բանն այն է, որ զեկույցը միայն խոսքով «հարձակում» չէ։ Եթե արդեն կա փաստաթուղթ, կարելի է ասել, որ գործ ունենք ծրագրային որոշման հետ։ Այսինքն՝ ամեն բան շատ լուրջ է։ Այսինքն՝ կարող է լինել, որ այդտեղ ինչ-որ ժամկետներ էլ հայտնվեն։ Դա կլինի արդեն հաջորդ քայլը։ Դրանից հետո արդեն այդ երկու դրվագները կմիավորվեն եւ Հայաստանին «կանջատեն» ամեն ինչից, ու Հայաստանն արդեն ամեն բան կստանա՝ ըստ համաշխարհային գների»,- ասել է փորձագետը։
Լեոնկովը նկատում է, որ Ռուսաստանին չի կարող չանհանգստացնել այն, որ Հայաստանում կառուցվում է խոշոր դատա-կենտրոն, որը կարող է կապված լինել ամերիկյան ռազմական գերատեսչության հետ։ «Բանն այն է, որ զեկույցը, ըստ էության, հանդիսանում է բոլոր պայմանագրերի խզման մասին նախնական իրազեկում։ Փաշինյանը պետք է հստակ որոշում կայացնի, թե դեպի ուր է ուզում տանել երկիրը, եւ ոչ թե փորձի հետագայում էլ երկու աթոռի վրա նստել։ Ռուսաստանն այլեւս նման խաղեր չի խաղում, քանի որ մեզ համար շատ ցավոտ գործոն է ի հայտ եկել՝ Հրազդանում դատա-կենտրոն է ստեղծվում։ Այն ամբողջապես ֆինանսավորվում է ամերիկացիների կողմից։ Դրա հզորությունները զգալիորեն աճեցին այն բանից հետո, երբ Ռուսաստանը Կիեւում ոչնչացրեց նմանատիպ դատա-կենտրոնները։ Բոլորն էլ հիանալի հասկանում են, որ այդ նախագիծն ամենեւին այն բանի համար չէ, որ Հայաստանն ունենա շատ արագ ինտերնետ կապ, եւ մարդիկ կարողանան վայելել 4K ֆորմատով կոնտենտով։ Քանի որ օբյեկտը գաղտնիության խիստ պայմաններ ունի, իսկ սարքավորումների մատակարարումն իրականացնում է Blackbird ընկերությունը, ապա դրանք կարող են լինել ռազմական նշանակության տեխնոլոգիաներ։ Ընդ որում, դատա-կենտրոնն աշխատում է Ռուսաստանից Հայաստանին մատակարարվող էժան էներգառեսուրսների հաշվին։ Չէ՞ որ Հայաստանի գազի 80 տոկոսը մատակարարվում է Ռուսաստանից՝ արտոնյալ գներով։ Բնականաբար, Ռուսաստանն այս հարցում ղեկավարվում է միայն իր ազգային շահերով»,- ասել է Լեոնկովը։