Հոկտեմբերի 29-ին լրահոսը բացարձակ գերիշխել է Ազգային ժողովում տեղի ունեցած ծեծկռտուքը իշխանական և ընդդիմադիր պատգամավորների միջև։ Օրակարգում են նաև Երևանում տեղի ունեցած փլուզումը, Հորմուզի նեղուցի շուրջ լարվածությունն ու Իրանի հետ բանակցությունները վերսկսելու ամերիկյան փորձը, Ուկրաինայի շուրջ եռակողմ բանակցությունների ամսաթիվը և Սլովենիայի արտգործնախարարի այցը։ Օրվա ընթացքում հրապարակվել է ավելի, քան 3220 նյութ, որոնք ուսումնասիրվել են մեդիա մոնիտորինգի վերլուծական գործիքակազմով։

ՕՐՎԱ ԹՈՓ ՆՈՐՈՒԹՅՈՒՆՆԵՐԸ

1. Ծեծկռտուք Ազգային ժողովում — 404 հիշատակում

Փաստեր։ ԱԺ նիստում իրավիճակը լարվել է ՔՊ պատգամավոր Տարոն Չախոյանի ելույթի ժամանակ։ «Ուժեղ Հայաստան» խմբակցության ղեկավար Նարեկ Կարապետյանը տեղից արձագանքել է, Չախոյանը պատասխանել է. «Արան դու ես, արան ոտից գլուխդ ես»։ Դրանից հետո ընդդիմադիր պատգամավորներն առաջ են եկել, և սկսվել է հրմշտոց, ապա ծեծկռտուք։ ԱԺ նախագահ Ռուբեն Ռուբինյանն սկզբում հայտարարել է. «Հատուկ ընդմիջում չեմ հայտարարում, որ բոլորը տեսնեն սա»։ Երբ պատգամավորները սկսել են ոտքերով ու ձեռքերով հարվածել միմյանց, մոտ 10 րոպե անց նա ընդմիջում է հայտարարել, իսկ ծեծկռտուքը շարունակվել է միջանցքում։ Ընդմիջումից հետո Ռուբինյանը հայտարարել է, որ տեսագրությունների համաձայն՝ առաջին հարվածը Չախոյանին հասցրել է Գառնիկ Դավթյանը։ Միջադեպի պատասխանատվությունը նա դրել է Նարեկ Կարապետյանի վրա։ Նույն օրը ԱԺ փոխխոսնակ Վահագն Ալեքսանյանի հետ միջադեպից հետո արգելվել է «Հայաստան» խմբակցության պատգամավոր Լևոն Քոչարյանի օգնական Արթուր Սուքոյանի մուտքը խորհրդարան։

Մեդիայի ուշադրության կենտրոնում։ Լրատվամիջոցները լայնորեն տարածել են ծեծկռտուքի տեսանյութերը և պատգամավորների վնասվածքների պատկերները։ Մեծ արձագանք է ստացել վարչապետ Նիկոլ Փաշինյանի դիրքորոշումը. «Ես դատապարտում եմ բռնությունը, բայց աջակցում եմ «Քաղաքացիական պայմանագիր» խմբակցության այսօր ձեռնարկած միջոցառումներին… աթոռո՞վ, թե՞ ինչով, համարժեք և ճիշտ է»։ Ֆեյսբուքում նա գրել է. «Ես գիտեի՝ գոնե ֆիզիկապես են ուժեղ։ Փաստորեն՝ չէ»։

Հակասող նարատիվներ։ Ռուբինյանը պնդում է, որ Չախոյանի ելույթում «չի եղել գեթ մեկ վիրավորական բառ», իսկ Sputnik Արմենիայի փոխանցմամբ՝ Չախոյանը «Հայաստան» խմբակցության պատգամավոր Մեսրոպ Մանուկյանին անվանել է «տուշոնկա գողացող Մանվելի օգնական»։ Ընդդիմությունը Չախոյանին որակում է «սադրիչ», իսկ մեղքը դնում է Ռուբինյանի վրա, որ նա միտումնավոր ժամանակին ընդմիջում չի հայտարարել և անվտանգության աշխատակիցներ չի կանչել։ Ընդդիմության խոսքով՝ միջադեպից հետո դահլիճից հեռացվել են միայն «Ուժեղ Հայաստանի» պատգամավորները։ Ռուբինյանը պնդում է, որ անվտանգության ծառայությանը կանչել է ծեծկռտուքի սկզբում։

2. Փլուզումներ Երևանում — 87 հիշատակում

Փաստեր։ Հոկտեմբերի 29-ին Էրեբունի վարչական շրջանի Գաջեգործների փողոցում՝ Աղի լիճ տանող ճանապարհին, կոյուղագծի անցկացման համար փորված հատվածը փլուզվել է, և աշխատակիցները մնացել են հողազանգվածի տակ։ Քաղաքապետի խոսնակ Ջուլիետա Ազարյանի խոսքով՝ երկու տուժածներից մեկը մահացել է, իսկ մյուսի կյանքին վտանգ չի սպառնում։ Քննչական կոմիտեն քրեական վարույթ է նախաձեռնել Քրեական օրենսգրքի 355-րդ հոդվածի 2-րդ մասով՝ աշխատանքների անվտանգության կանոնները խախտելու համար, որն անզգուշությամբ մարդու մահ է առաջացրել։ Միաժամանակ հրապարակվել են մանրամասներ հոկտեմբերի 28-ին Երվանդ Օտյան փողոցում տեղի ունեցած բնակելի տան փլուզման մասին. փլատակներից դուրս է բերվել երկու քաղաքացի, որոնք հոսպիտալացվել են։

Մեդիայի ուշադրության կենտրոնում։ Լրատվամիջոցները ներկայացրել են ականատեսների պատմությունները և փրկարարական աշխատանքների ընթացքը։

3. Իրան–ԱՄՆ. Հորմուզ և բանակցություններ վերսկսելու փորձ — 82 հիշատակում

Փաստեր։ The Wall Street Journal-ի տվյալներով՝ ԱՄՆ փոխնախագահ Ջեյ Դի Վենսը Թրամփի ցուցումով նամակ է ուղարկել Իրանի Ազգային անվտանգության բարձրագույն խորհրդի քարտուղար Մոհսեն Ռեզաիին՝ փորձելով վերսկսել բանակցությունները։ Թերթի տեղեկություններով՝ նամակում կոնկրետ խաղաղության առաջարկներ չեն եղել, և Թեհրանը դեռ չի պատասխանել։ ԻՀՊԿ-ն հայտնել է, որ Հորմուզի նեղուցի մոտ խոցել է ամերիկյան MQ-1 անօդաչու (ըստ կորպուսի՝ տասնչորսերորդը), իսկ նեղուցի չարտոնված հարավային երթուղով անցնելիս՝ երեք նավթատար լցանավ ականների վրա պայթել ու հրդեհվել է։ Արաղչին ասել է, որ Իրանը միջնորդների հետ քննարկում է Հորմուզի բացման 7-օրյա ծրագրի ժամկետը կրճատելու ուղիները։ Թրամփն այդ ծրագիրն ավելի վաղ մերժել էր։

Մեդիայի ուշադրության կենտրոնում։ Ուշադրության կենտրոնում են զուգահեռ ընթացող երկու գործընթաց՝ ԱՄՆ-ի նախազգուշացումն արաբական երկրներին հնարավոր կարճատև, բայց ինտենսիվ ռազմական գործողության մասին և Վենսի դիվանագիտական փորձը։

Հակասող նարատիվներ։ Վաշինգտոնը միաժամանակ պատրաստվում է ռազմական գործողության և փնտրում է երկխոսության հնարավորություն։ Թեհրանը, իր հերթին, ականապատում է նեղուցը, բայց խոսում է այն վերաբացելու ծրագրի մասին։

4. Ուկրաինա. եռակողմ բանակցությունները՝ նոյեմբերի 4-ից հետո — 79 հիշատակում

Փաստեր։ Պուտինի օգնական Յուրի Ուշակովը հայտարարել է, որ Ռուսաստան–ԱՄՆ–Ուկրաինա եռակողմ խորհրդակցությունները կանցկացվեն նոյեմբերի 4-ից հետո, և ժամկետները կախված կլինեն նաև ռազմաճակատում իրավիճակից։ Տուսկի այն հայտարարությանը, թե հանդիպումը կարող է կայանալ նոյեմբերի 4-ին, նա պատասխանել է. «Մենք դեռ որևէ ազդակ չենք փոխանցել»։ Պեսկովը հաստատել է, որ բանակցություններին ԵՄ-ի մասնակցություն չի նախատեսվում։ Ուկրաինայի ԱԳ նախարար Անդրեյ Սիբիգան հայտնել է, որ Զելենսկին պատրաստ է Պուտինի հետ քննարկել նույնիսկ ամենաբարդ հարցերը, այդ թվում՝ տարածքայինները։

Մեդիայի ուշադրության կենտրոնում։ Լուսաբանվել է եվրոպացիների բացառումը բանակցություններից։ Զելենսկին ասել է, որ Ուկրաինան չի հրաժարվի եռակողմ հանդիպումից, եթե ԱՄՆ-ն պնդի առանց Եվրոպայի ձևաչափի վրա։ Առանձին ուշադրության է արժանացել այն լուրը, որ Ադրբեջանը Ուկրաինային է փոխանցել 1,5 մլն դոլարի էներգետիկ սարքավորումներ։

Հակասող նարատիվներ։ Ռուսաստանը շեշտում է, որ չի դադարեցնի ռազմական գործողությունները բանակցությունների ընթացքում, իսկ Կիևի հիմնական ուղերձը հրադադարի պահանջն է։

5. Սլովենիայի արտգործնախարարի այցը — 48 հիշատակում

Փաստեր։ Սլովենիայի արտաքին և եվրոպական հարցերի նախարար Տոնե Կայզերին ընդունել են վարչապետ Նիկոլ Փաշինյանը, ԱԺ նախագահ Ռուբեն Ռուբինյանը և Ալեն Սիմոնյանը։ Կողմերը քննարկել են քաղաքական երկխոսությունը, տնտեսության, տեխնոլոգիաների և ներդրումների ոլորտներում համագործակցությունը, ինչպես նաև Հայաստան–ԵՄ հարաբերությունները։ Երևանում մեկնարկել է Հայաստան–Սլովենիա գործարար համաժողովը, իսկ Կայզերը հարգանքի տուրք է մատուցել Հայոց ցեղասպանության զոհերի հիշատակին։

Մեդիայի ուշադրության կենտրոնում։ Միրզոյանը գործարար համաժողովում ասել է, որ նպատակն է «տնտեսական զարգացումները վերածել առևտրի աճի և նոր ներդրումների»։

ՕՐՎԱ ԹՈՓ ՆՅՈՒԶՄԵՅՔԵՐՆԵՐԸ

1. Նիկոլ Փաշինյան. ԱԺ ծեծկռտուքի մասին հայտարարությունները («աթոռո՞վ, թե՞ ինչով, համարժեք և ճիշտ է») և այն միտքը, որ ընդդիմությանը «առաջարկ, որից չի կարող հրաժարվել» կներկայացնի նոր Սահմանադրության հարցով։
2. Ռուբեն Ռուբինյան. Նիստը չընդհատելը ծեծկռտուքի ժամանակ, տեսագրությունների իր գնահատականը և Սլովենիայի պատվիրակության ընդունելությունը։
3. Տարոն Չախոյան. Ելույթը, որի ժամանակ սկսվել է ծեծկռտուքը։
4. Նարեկ Կարապետյան. Ծեծկռտուքի մասնակցությունն ու արձագանքը։
5. Վահագն Ալեքսանյան. Միջադեպը Լևոն Քոչարյանի օգնականի հետ, որից հետո վերջինիս մուտքը ԱԺ արգելվել է։

ԿԱՐԵՎՈՐ ՆՈՐՈՒԹՅՈՒՆՆԵՐ, ՈՐՈՆՔ ԹՈՓՈՒՄ ՉԵՆ

• Փաշինյանի «առաջարկը» ընդդիմությանը. Վարչապետն ասել է, որ «մեծ է հավանականությունը, որ բանը արտահերթ ընտրությունների չի հասնի», և կձևակերպվի առաջարկ, «որից ընդդիմությունը չի կարող հրաժարվել»։ «Ժողովուրդ»-ի տվյալներով՝ նա հանձնարարել է արագացնել սահմանադրական փոփոխությունները, որպեսզի նախագիծը հանրային քննարկման դրվի արդեն նոյեմբերի վերջին։
• Ինքնաթիռի վերադարձը «Զվարթնոց». «Ազիմուտ» ավիաընկերության Երևան–Միներալնիե Վոդի չվերթն իրականացնող ինքնաթիռը թռիչքից 15 րոպե անց աղետի ազդանշան է տվել և վերադարձել է մեկնման օդանավակայան։
• Իսրայելի ընտրությունները. Քվեների 90%-ի հաշվարկով առաջատար է Նեթանյահուի գլխավորած դաշինքը։
• Իսպանիայում եռօրյա սուգ. Մադրիդ–Սևիլիա գծում արագընթաց գնացքների բախման զոհերի թիվը հասել է առնվազն 68-ի։ Վարչապետ Պեդրո Սանչեսը հայտարարել է, որ աղետի պատճառները հետաքննվում են։
• Արցախից տեղահանվածների աջակցություն. Կառավարությունը երկարաձգել է սոցիալական աջակցության ծրագրերը, բայց գումարի չափը կփոխվի։
• Գագիկ Խաչատրյանի կալանքը. Դատարանը 2 ամսով երկարաձգել է ՊԵԿ նախկին նախագահի կալանքը։ Պաշտպանը պնդում էր, որ առողջական վիճակի պատճառով առնվազն տնային կալանք պետք է կիրառվեր։
• Զախարովան՝ Շիրակի մարզպետի մասին. ՌԴ ԱԳՆ խոսնակը մարզպետ Առուշանյանի «իվանների» մասին արտահայտությունը որակել է «կոպիտ նեոնացիստական կարգախոս» և հայկական իշխանություններից «միանշանակ» արձագանք է սպասում։
• Պայթյուն գազալցակայանում. Մասիս համայնքի Խաչփառ բնակավայրի գազալցակայանում ավտոմեքենա է պայթել։
• Լիլիթ Ստեփանյանը՝ Կոտայքի մարզպետ. Մանդատը վայր դրած ՔՊ պատգամավորի նշանակումը ներառվել է կառավարության օրակարգում։
• Առողջապահական ապահովագրություն. 2027-ից համակարգից կօգտվեն նաև մինչև 200 հազար դրամ աշխատավարձ ստացողները։

ԱՅԼ ՆՈՐՈՒԹՅՈՒՆՆԵՐ

• «Զվարթնոց» օդանավակայանում ծափերով դիմավորել են աշխարհի առաջնությունից վերադարձած հայ մարզիկներին։ Հրաձիգ Էլմիրա Կարապետյանը ոսկե մեդալ է նվաճել աշխարհի գավաթի խաղարկության հերթական փուլում։
• Ադրբեջանի ԱԳ նախարար Ջեյհուն Բայրամովն Անկարայում հանդիպել է Հաքան Ֆիդանի հետ։ Լավրովը, Bloomberg-ի տվյալներով, այս շաբաթ կմեկնի ԱՄՆ՝ G20-ի արտգործնախարարների հանդիպմանը։