Շուշին հայկական էր, դրա համար էր մեզ պետք
Mon, 09 Nov 2026 12:52:45 +0400
Արցախյան պատերազմի հետևանքով կրած պարտությունից հետո անգամ հայկական կողմը դեռևս պահպանում էր Արցախում ներկայության հնարավորությունը, սակայն այսօր իրավիճակն արմատապես փոխվել է։ Այս մասին Եռաբլուրում լրագրողների հետ զրույցում հայտարարել է ԱԺ «Հայաստան» խմբակցության ղեկավար Աննա Գրիգորյանը։
Նրա խոսքով՝ Շուշին հայկական կողմի համար կարևոր էր իր ազգային պատկանելության և պատմական նշանակության պատճառով, մինչդեռ Նիկոլ Փաշինյանի՝ քաղաքում տրնգի պարելու և այնուհետև Շուշին «դժգույն ու դժբախտ» որակելու վարքագիծն անընդունելի էր։
Անդրադառնալով 2020 թվականի նոյեմբերի 9-ի եռակողմ հայտարարությանը՝ ընդդիմադիր պատգամավորը նշել է, որ դրա նշանակությունն ու բովանդակությունն ըստ էության կորցրել են իրենց իմաստը, քանի որ Արցախն այլևս գոյություն չունի հայկական պետականության և ներկայության տեսանկյունից։
Գրիգորյանի գնահատմամբ՝ պատերազմում պարտությունից հետո ևս հայկական կողմը հնարավորություն ուներ այցելել Ստեփանակերտ և պահպանել կապն Արցախի հետ, թեև արդեն սահմանափակված ու նախկինից տարբեր պայմաններում։ Մինչդեռ այսօր իշխանությունների քաղաքականությունը, նրա համոզմամբ, հանգեցրել է նոր զիջումների և դիվանագիտական պարտությունների հեռանկարի։
Ընդդիմադիր գործչի խոսքով՝ Հայաստանի իշխանությունները շարունակում են հույս ունենալ, որ ադրբեջանական պահանջները բավարարելու միջոցով հնարավոր կլինի հասնել կայուն խաղաղության, սակայն այդ մոտեցումը չի կարող արդյունք տալ։
«Մեզ Շուշին պետք էր, որովհետև Շուշին հայկական էր, մեզ պետք չէր Նիկոլ Փաշինյանը, որ պետք է գնար Շուշիում տրնգի պարեր ու հետո հայտարարեր, որ Շուշին դժգույն ու դժբախտ էր», -ասել է նա: