«Արցախը չի մոռացվել»․ կիպրոսցիներն էլ իրենց ցավի մասին հիշեցրին Երևանում
Fri, 13 Nov 2026 12:48:40 +0400
Հայաստանի և Կիպրոսի ազգային հավաքականների հանդիպումը Երևանում ուշագրավ էր ոչ միայն խաղադաշտում տեղի ունեցած իրադարձություններով։ Նոյեմբերի 12-ին Վազգեն Սարգսյանի անվան «Հանրապետական» մարզադաշտում երկու երկրների երկրպագուները հանդես են եկել խորհրդանշական նախաձեռնություններով՝ միջազգային հանրության ուշադրությունը հրավիրելով իրենց ժողովուրդների պատմական հիշողության և չլուծված խնդիրների վրա։
Կիպրոսցի երկրպագուները մարզադաշտում ցուցադրել են իրենց երկրի դրոշը՝ «Δεν Ξεχνώ»՝ «Չեմ մոռանում» գրությամբ։ Այս ուղերձը վերաբերում է Կիպրոսի պատմությանը և կղզու հյուսիսային հատվածի օկուպացիային։ Այն յուրահատուկ խորհուրդ ուներ հատկապես այն հանգամանքի պատճառով, որ ակցիան տեղի էր ունենում Հայաստանում՝ մի երկրում, որի հասարակությունը նույնպես ունի բռնի տեղահանության և հայրենիքի կորստի սեփական ցավալի փորձը։
Հայ երկրպագուներն իրենց հերթին տրիբունաներում պարզել են «Artsakh Has Not Been Forgotten»՝ «Արցախը չի մոռացվել» գրությամբ պաստառ։ Դրանով հիշեցվել է 2023 թվականի սեպտեմբերյան իրադարձությունների և Ադրբեջանի ռազմական գործողություններից հետո Արցախից ավելի քան 120 հազար հայերի բռնի տեղահանության մասին։