Չինաստանը ավելի քան 100 ռազմանավ է դուրս բերել Թայվանի դեմ
Fri, 13 Nov 2026 21:52:23 +0400
Չինաստանը նոյեմբերի սկզբին Թայվանի շուրջ և Խաղաղ օվկիանոսի արևմտյան հատվածում լայնածավալ, նախապես չհայտարարված զորավարժություններ է իրականացրել։ Այս մասին հայտնել են թայվանցի անվտանգության պաշտոնյաները, փոխանցում է Taipei Times -ը։
Նրանց տվյալներով՝ գործողություններին մի պահ մասնակցել են ավելի քան 100 ռազմական և առափնյա պահպանության նավեր։ Զորավարժությունների ընթացքում մշակվել են օտարերկրյա զինված ուժերի և քաղաքների, այդ թվում՝ Թայվանի բնակավայրերի դեմ հարձակումների սցենարներ։ Հաղորդվում է նաև չինական սուզանավից միջմայրցամաքային բալիստիկ հրթիռի արձակման մասին։
Թայվանում այս գործողությունները որակել են որպես լուռ ահաբեկում։ Չինաստանի պաշտպանության նախարարությունը չի մեկնաբանել տեղեկությունները։ Զորավարժությունները տեղի են ունեցել Չինաստանում Դոնալդ Թրամփի և Սի Ծինփինի սպասվող հանդիպման նախաշեմին։