Վերջին օրերին ակտիվ վոյաժների մեջ գտնվող Նիկոլ Փաշինյանը, իր խոսքով` երեկ «կարճատեւ այցով» էր Հայաստան ժամանել, իսկ այսօր արդեն մեկնել է Կամբոջա։ Թռիչքից առաջ նա ֆեյսբուքյան իր էջում տեսանյութ է հրապարակել, որում հարվածային գործիքների վրա նվագում է։ Մեր տեղեկություններով, նա դեկտեմբերի վերջին մասնակցելու է ամանորյա համերգին, որը կայանալու է Մարզահամերգային համալիրում: Մենք Փաշինյանի մամուլի խոսնակ Մելանյա Հարությունյանից հետաքրքրվեցինք՝ արդյոք վերջինս պատրաստվում է Վարչաֆեստ -2026 երաժշտական մրցույթ-փառատոնի գալա համերգի ընթացքում ելույթ ունենալ Վարչաբենդ խմբի հետ։ Մելանյա Հարությունյանը ասաց, որ ձեւաչափը դեռ պարզ չէ, եթե պարզ լինի, կհրապարակեն։

Հիշեցնենք, որ Փաշինյանը նոյեմբերի 10-ին Փարիզում էր, որտեղ մասնակցում էր Խաղաղության 9-րդ համաժողովին, հաջորդ օրը մեկնեց Անթալիա, որտեղ մասնակցեց COP 31-ին, այնուհետեւ Դուբլինում մասնակցեց Եվրոպական քաղաքական համայնքի 9-րդ գագաթնաժողովին, որտեղից մեկ օրով Երեւան վերադառնալուց հետո այսօր ուղեւորվեց Կամբոջա, մասնակցելու Ֆրանկոֆոնիայի միջազգային կազմակերպության գագաթնաժողովին։ Իսկ դեկտեմբերին երեք այցելություն ունի Ռուսաստան:

Նշենք, որ Վարչաֆեստ 2026 երաժշտական մրցույթ-փառատոնի լավագույն բենդերը ամանորյա համերգով հանդես կգան։ Սակայն այս անգամ համերգն անվճար չի լինելու։ Այն տեղի է ունենալու դեկտեմբերի 26-ին՝ Մարզահամերգային համալիրում, իսկ տոմսերը կարժենան 5 հազարից 30 հազար դրամ։ Համերգի ընթացքում ելույթներով հանդես կգան Red Line, Dophamin, Nushband, Folkastic, NORG, Pink Stones, Algorithm, Ethnorhytm, Edi Band եւ Taniqum Band խմբերը։