ԵՄ-ն քննարկում է պատերազմի մասնակից ռուսների մուտքի արգելքը Շենգենյան գոտի
Tue, 17 Nov 2026 13:30:16 +0400
Եվրամիությունը շարունակում է քննարկել պատերազմի ռուս մասնակիցների մուտքն արգելելու հարցը, իսկ նրանց տվյալները ստանալը «շատ հեշտ կլիներ», ասել է Եվրամիության դիվանագիտության ղեկավար Կայա Կալլասը։
«Պետք է ասեմ, որ Ռուսաստանը իրականում շատ բյուրոկրատական երկիր է, ուստի նրանք գրառումներ են պահում պատերազմին մասնակցած բոլոր անձանց մասին։ Այսպիսով, կարծում եմ, որ այս տվյալները ստանալը, հավանաբար, բավականին հեշտ է, հաշվի առնելով, որ այսօր ամեն ինչ թվային է», – ասել է Կալլասը Բրյուսելում կայացած մամուլի ասուլիսում։
Լրագրողների հարցին, թե ինչպե՞ս ստանալ այս տվյալները, նա պատասխանել է. «Այսօր կան հնարավորություններ։ Մենք բոլորս ունենք շատ լավ հետախուզության աշխատակիցներ։ Ես տեխնիկական հարցերի մասնագետ չեմ, բայց մասնագետները ասում են, որ այս տվյալները ստանալը բավականին հեշտ է»։
Պետդումայի խոսնակ Վյաչեսլավ Վոլոդինը պատասխանել է՝ պնդելով, որ Կալլասը, որը «հրապարակայնորեն հայտարարել է պատերազմի մասնակիցների անձնական տվյալները գողանալու իր մտադրության մասին», խախտել է քրեական օրենսգրքի առնվազն երեք հոդված։ «Նրան սպառնում է ազատազրկում դրա համար», – հավելել է Վոլոդինը, նշելով, որ իր մեջբերած մեղադրանքների համար համակցված պատիժը կարող է լինել մոտավորապես 20 տարի։
Մեկ օր առաջ Եվրամիությունը ընդլայնեց Ռուսաստանի դեմ պատժամիջոցների ցանկը՝ ներառելով նավթավերամշակման գործարաններ, նավթաքիմիական գործարաններ և ձեռնարկություններ, ինչպես նաև տասնյակ բանկեր: Պատժամիջոցների տակ են հայտնվել նաև Wildberreis-ի հիմնադիր Տատյանա Կիմը, Վալենտինա Մատվիենկոյի որդին՝ Սերգեյը, և Leta Capital ռիսկային կապիտալի հիմնադրամի հիմնադիր Ալեքսանդր Չաչավան։
2026 թվականի հուլիսին Եվրամիությունը համաձայնեց Ռուսաստանի դեմ պատժամիջոցների 21-րդ փաթեթին, որը Կալլասը անվանեց «ամենամեծը» չորս տարվա ընթացքում: Եվրոպական դիվանագիտության ղեկավարի խոսքով՝ 22-րդ փաթեթը ներկայումս պատրաստվում է: