Լավ հաշվիր, որ քեզ չհաշվեն

Fri, 12 Jun 2026 18:45:08 +0400

Հուսամ՝ Վահագն Հովակիմյանն իր խոսքի տերն է լինելու եւ դատի է տալու բոլորին, ովքեր կփորձեն կեղծ թվեր հրապարակել ընտրությունների արդյունքների մասին եւ մոլորեցնել հանրությանը: Պարոն Հովակիմյան, ես մի հարց կուզենայի պարզել․ ե՞րբ եք դատի տալու եւ դատի տալո՞ւ եք, արդյոք, նրանց, ովքեր հանդգնել են թվակեղծարարություն անել դեռ ԿԸՀ-ի կողմից նախնական արդյունքների հրապարակումից առաջ: Ես, օրինակ, ճանաչում եմ մեկին, որ հունիսի լույս 8-ի գիշերը, երբ տեղամասերի 10 տոկոսի արդյունքներն էին միայն ամփոփվել, մամուլի ասուլիս տվեց ու հայտարարեց, որ ինքը 54 տոկոս ձայն է հավաքել: Դիցուք՝ այս մարդուն դատի տալո՞ւ եք, պարոն Հովակիմյան, թե՞ փորձելու եք շրջանցել այս խայտառակությունն ու ընկնել լրագրողների հետեւից, որ, ասացեք խնդրեմ, որոշ անճշտություններ են թույլ տվել իրենց հրապարակած թվերում:

Պարոն Հովակիմյան, իրականում տեղի է ունեցել մի մե՜ծ խայտառակություն: Վրաստանի վարչապետ Կոբախիձեն, Ֆրանսիայի նախագահ Մակրոնը, պատկերացնո՞ւմ եք, ՀՀ ԿԸՀ նախագահից ավելի շուտ են իմացել, որ Նիկոլը «կրել է» այս ընտրություններում, եւ շնորհավորել են Նիկոլին: Ինչպե՞ս կբացատրեք այս անոմալիան, չէ՞ որ դուք եք այն մարդը, որ առաջինն է իմանում ընտրություններում այս կամ այն ուժի հաղթանակի մասին: Մակրոնն ինչքան էլ շատ սիրի Նիկոլին, Ձեզնից ավելի շատ չի կարող սիրել, այդպես չէ՞: Եվ, ուրեմն, ինչպե՞ս պատահեց, որ նա Ձեզնից շուտ շնորհավորեց Ձեր շեֆին, այն էլ՝ ընտրություններում տարած վստահ հաղթանակի կապակցությամբ:

Երկրորդ մարդը, պարոն Հովակիմյան, որին պետք է դատի տալ, չզարմանաք, Դուք եք: Բացատրեմ՝ ինչու: Ուրեմն, տեսնելով ընտրատեղամասերից ստացված առաջին արդյունքները, հասկանալով, որ նույնիսկ պարզ մեծամասնություն չեն կարողանում կազմել, ՔՊ-ն անցավ գործի: Ես ասեմ՝ ՔՊ-ն, դու հասկացիր՝ Նիկոլը: Եվ, ուրեմն, Նիկոլն անցավ գործի… Ի՞նչ է հրահանգել Նիկոլն անձամբ քեզ, պարոն Հովակիմյան, կարո՞ղ ես ասել, եթե գաղտնիք չէ: Նա որեւէ հրահանգ չի՞ տվել, չի՞ ասել՝ Վահագ, վիզդ կպոկեմ, եթե 3/5 կամ 2/3 չունենանք, ֆայլաբազարից մարդ կբերեմ, կնշանակեմ ԿԸՀ նախագահ: Ո՞չ: Այդ դեպքում՝ ավելի վատ քեզ համար, պարոն Հովակիմյան, Նիկոլը կգնա քնելու, իսկ դու կգնաս աշխատանքային գաղութ՝ կամայական թվանկարչության հոդվածով: Մի քիչ արագ կողմնորոշվիր, Վահագ, ժամանակը քո դեմ է աշխատում: Նորից կրկնեմ` տեղի է ունեցել խայտառակություն, փոխանակ Նիկոլը հետեւի ԿԸՀ-ի հաշվարկներին, դուք եք հետեւել Նիկոլի հայտարարություններին: Երկուսդ էլ հավասարապես ք.քի մեջ եք, դա չէ հարցը, ուղղակի պետք է հիմա պարզել՝ դու, պարոն Հովակիմյան, ք.քի մեջ ես ընկել Նիկոլի հրահանգո՞վ, թե՞ կամովի՝ Նիկոլի, հետեւաբար նաեւ սեփական պաշտոնի սիրուց դրդված:

Կարծիք կա, պարոն Հովակիմյան, որ ԲՀԿ-ի շուրջ լուրջ «բազարներ» են ընթացել՝ թողնել խորհրդարան, չթողնել: Սա ի՞նչ նոր բան է, դո՞ւք պիտի որոշեիք այդ հարցը: Զադնի-պերեդնի, զադնի-պերեդնի… Մի հատ կողմնորոշվեք՝ դո՞ւք եք որոշողը, թե՞ ԲՀԿ-ի ընտրազանգվածը: Ընդամենը երկու տեղամաս բացեցին, պարզվեց՝ ԲՀԿ-ն անցել է խորհրդարան, ինչի արդյունքում ՔՊ-ն 4 աթոռ է կորցրել: Եվ ես պատկերացնում եմ, թե դեռ ինչեր կպարզվեն, եթե բոլոր 2005 տեղամասերը բացվեն:

Նորմալ երկրներում, Վահագ ջան, այդ երկրների առաջնորդներն ու ԿԸՀ նախագահները տեղում հրաժարականի դիմում կգրեին: Դու եկել, գիտությունով ես չալում, թե բա՝ «տող է թռել», Նիկոլը թառել ամբիոնին՝ հաթաթա է տալիս Գագիկ Ծառուկյանին՝ կնստացնեմ, «ստոյկա կտաս», ֆլան-ֆստան: Չեք կարողանում մարսել 4 աթոռի կորուստը, այո՞: Եվ ոչ միայն դա… Ե՞րբ պիտի հրապարակեք ընտրությունների վերջնական արդյունքները: Խորհուրդ եմ տալիս դա անել համապարփակ ձեւով, այսինքն՝ ըստ կուսակցությունների եւ դաշինքների հրապարակեք ե՛ւ նախնական արդյունքները, ե՛ւ փոփոխված: Ես մեծ ցանկություն ունեմ լսելու թե՛ իրական եւ թե՛ նկարված թվերը: Ուզում եմ դրանք համեմատել, որպեսզի հասկանամ, թե ինչ բոյի է եղել 2026-ի ընտրություններում արձանագրված խայտառակությունը: Ընդդիմադիրներից հարյուրավոր ձայներ են կորել, հազարավոր ձայներ հավելագրվել ՔՊ-ին․ չիմանա՞նք՝ ով է արել, ինչու է արել, ինչպես է արել, մենա՞կ է արել, թե՞ հրահանգով: Ու մեկ էլ իմացիր, հարգելի Վահագն Հովակիմյան, ինչ էլ լինի՝ Նիկոլը չի ընդունելու, որ ընտրակեղծարար է: Այնպես որ, պատրաստվիր՝ այս գործում «կրայնին» դու ես: