DATARK

«Գևորգյան» պարային ակադեմիայի սաների շնորհիվ հայկական դրոշը ծածանվեց աշխարհահռչակ «DOLBY» համերգասրահում

Հայտնի է, մշակույթը մարդկային քաղաքակրթության անբաժանելի ու կարևորագույն մասն է, ավելին՝ քաղաքակրթության ծագումն ինքնին կապված է մարդկային մշակույթի ծագման ու զարգացման հետ: Այն ժամանակակից ազգերի ու պետությունների կյանքի անբաժանելի մասնիկն է, որ ձևավորում է ինքնությունը, արժեքներն ու հասարակության ընդհանուր տրամադրությունը և գործում է որպես կամուրջ՝ անցյալը կապելով ներկայի և ապագայի հետ։
Մշակույթի կարևորագույն ճյուղերից է պարարվեստը, որ խորապես կապված է ժողովրդի մշակութային ինքնության, ավանդույթների և հասարակական կյանքի հետ։ Այն արտացոլում է տվյալ ազգի արժեքները, պատմությունը և բնավորությունը, ծառայում որպես հուզական ինքնարտահայտման միջոց, մշակույթի պահպանման ճանապարհ։
Լոս Անջելեսի «Dolby» աշխարհահռչակ համերգասրահում մայիսի 25-ին տեղի ունեցավ «Գևորգյան» պարի ակադեմիայի 30-ամյա գործունեությանը նվիրված հոբելյանական համերգը: Արդեն 3 տասնամյակ է, ինչ այս ակադեմիան իր անգնահատելի ներդրումն է ունենում ԱՄՆ-ում հայի տեսակի պահպանման, ազգային մշակույթի զարգացման ու համամարդկային արժեքների ջատագովման գործում:
Վարդան ու Սիրանույշ Գևորգյաններին, իսկ հիմա արդեն նրանց արժանի զավակներ՝ Սոնայի և Ալեքսի աշխատասիրության շնորհիվ հաջողվել է շարունակել իրենց ծնողների ստեղծած կառույցը, որն էտալոնային է համարվում պարարվեստի բնագավառում՝ կրթելով ու դաստիարակելով բազմաթիվ սերունդներ, այդ սերունդներին հայկական ինքնություն հաղորդելով:
Գևորգյանները հայկական մշակույթի իսկական նվիրյալներ են, որ օտար ափերում մշտապես հանդիսացել են մի յուրատեսակ փարոս, որից արձակված լույսը կողմնորոշիչ է եղել կյանքի փոթորկալից ծովում խարխափող շատ ու շատ հայերի համար՝ չձուլվելու ամենակուլ ամերիկյան մշակույթին՝ պահպանելու սեփական ազգային գույնն ու գենը:
Համերգը, որ հայկական մշակույթի իսկական տոնախմբության էր վերածվել, վարում էր հաղորդավար Ռաֆայել Մնացականյանը, որ իր խոսքին բնորոշ գրավիչ առոգանությամբ ներկայացրեց պարային ակադեմիայի գործունեությունը, անցած ուղին այն անջնջելի հետքը, որ հատուկ է միայն «Գևորգյան» ակադեմիային:
Այնուհետև ողջույնի խոսքով հանդես եկավ ՀՀ ժողովրդական արտիստ, «Երևան քաղաքի զինանշանով» պարգևատրված, «Գարեգին Նժդեհ», «Ֆրիտյոֆ Նանսեն», Մովսես Խորենացու մեդալների արժանացած ու բոլորի կողմից անսահմանորեն սիրված Աշոտ Ղազարյանը:
Համերգին բեմ դուրս եկավ 700 երեխա՝ մեկը մյուսից տաղանդավոր, մեկը մյուսից հիասքանչ ու գեղեցիկ: Դեկորացիան, զգեստներն իսկապես անկրկնելի էին և անմոռանալի տպավորություն թողեցին հանդիսատեսի վրա՝ ի ցույց դնելով այն պրոֆեսիոնալիզմը, որ բնորոշ է «Գևորգյան» պարի ակադեմիայի ղեկավարությանը՝ բոլոր առումներով:
«Գևորգյան» պարի ակադեմիան, անշուշտ, կատարում է շատ կարևոր մի գործառույթ ևս՝ սփյուռքի հայ երեխաներին կտրում է փողոցից, հաղորդակից դարձնում ազգային մշակույթին, օգնում, ձեռք բերում նոր՝ հայ ընկերներ, ամրապնդում արմատներն ու հաղորդում հավելյալ ազգային իմունիտետ:
Ահա հենց սա է նաև պատճառը, որ ակադեմիայի սաների թիվը շատ մեծ է և տարիների ընթացքում միմիայն աճում է: Այդ վստահությունը կարևոր ցուցիչ է այն գաղափարական աշխատանքի, որի շնորհիվ ակադեմիան Սփյուռքում ունի իր անփոխարինելի տեղն ու դերը:
Գևորգյանների ընտանիքի երկու սերունդ իրեն նվիրել է ազգանվեր մեծ գործին՝ սերունդներ դաստիարակելուն, հայկական պարարվեստին հաղոդակից դարձնելուն: Այսօր էլ Սոնան ու Ալեքսը պատվով առաջ են տանում իրենց վաստակաշատ ծնողների նվիրական գործը՝ 700 երեխայի հայկական մշակույթի դեսպան դարձնելով:
Նշենք նաև, որ համերգին ներկա էին բազմաթիվ երևելի դեմքեր՝ Լոս Անջելեսում ներկա ու նախկին ՀՀ դիվանագիտական կորպուսի ներկայացուցիչներ, բարձրաստիճան պաշտոնյաներ, համայնքի ազդեցիկ դեմքեր և այլք:
Համերգի վեջում 700 երեխա մի մարդու պես դուրս եկավ բեմ՝ զարդարված հայկական եռագույնով: Տպավարություն էր,ասես թե հայտնվել ես ինչ-որ համազգային յուրօրիանակ մի շքերթում՝ ներշնչված հայկականությամբ ու ազգային ոգով:
Համերգի վերջում բեմ դուրս եկան 700 սաները, Վարդան, Սիրանույշ Գևորգյանների երեք զավակները՝ Սոնան, Նինելը և Ալեքսը, ինչն էլ մեծ ֆուռոր առաջացրեց երեխաների մոտ, որից հետո բեմ հրավիրվեցին «Գևորգյան» պարի ակադեմիայի հիմնադիրներ տեր և տիկին Վարդան և Սիրանույշ Գևորգյանները՝ բարձրացնելով մեծ հուզական ալիք ու ոգևորություն:
Շնորհակալություն «Գևորգյան» պարային ակադեմիային:
Վստահ ենք, որ դեռ շատ առիթներ են լինելու ու շատ հոբելյաններ են նշվելու, քանի որ այն գործը, որ ակադեմիան է անում Լոս Անջելեսում, իսկապես համազգային նշանակության ու անգնահատելի ներդրում է Սփյուռքի պահպանման ու օտար ափերում հայկական մշակույթի պրոպագանդման գործում:
Գայանե Մանուկյան
Source: USAArmenia