Անսպասելի շրջադարձ․ ԱՄՆ-ն չի՞ հարվածի Իրանին
Fri, 27 Feb 2026 11:30:38 +0400
Ամերիկյան պատվիրակության անդամները Ժնևում Իրանի հետ անուղղակի բանակցությունների երրորդ փուլի արդյունքները «դրական» են անվանել, հաղորդում է Axios-ի լրագրող Բարաք Ռավիդը՝ հղում անելով իր սեփական աղբյուրներին։
«Ամերիկացի բարձրաստիճան պաշտոնյան ինձ ասաց. Ժնևում Իրանի միջուկային ծրագրի շուրջ բանակցությունները դրական էին», – գրել է նա X-ում։
Ավելի վաղ, աղբյուրին հղում անելով, Ռավիդը հայտնել է, որ ԱՄՆ նախագահի հատուկ դեսպանորդ Սթիվեն Ուիտկոֆը և ձեռնարկատեր, Թրամփի փեսա Ջարեդ Քուշները «հիասթափված» են Ժնևում բանակցությունների առավոտյան հատվածում իրանական պատվիրակության կողմից արված հայտարարություններից։
Ավելի վաղ Իրանի արտաքին գործերի նախարար Աբբաս Արաղչին Ժնևում ԱՄՆ-ի հետ բանակցությունների ներկայիս փուլը անվանել է «ամենալուրջներից մեկը»։ Նրա խոսքով՝ իրանական և ամերիկյան պատվիրակությունները Ժնևում «նշանակալի առաջընթաց» են գրանցել և սկսել են քննարկել ապագա համաձայնագրի տարրերը։
Իրանական և ամերիկյան տեխնիկական թիմերը խորհրդակցություններ կսկսեն երկուշաբթի՝ Վիեննայում, իսկ բանակցությունների հաջորդ փուլը կկայանա մեկ շաբաթից էլ պակաս ժամանակ անց, ասել է Արաղչին։