Փահլեվին դիմել է իրանցիներին
Sat, 28 Feb 2026 12:18:14 +0400
Իրանը ճակատագրական պահ է ապրում, հայտարարել է թագաժառանգ Ռեզա Փահլավին իրանցի ժողովրդին ուղղված իր ուղերձում։
«ԱՄՆ նախագահի կողմից Իրանի քաջարի ժողովրդին խոստացված օգնությունն այժմ ժամանել է։ Սա մարդասիրական միջամտություն է, և դրա թիրախը Իսլամական Հանրապետությունն է, նրա բռնաճնշումների ապարատը և սպանության մեքենան, այլ ոչ թե Իրանի մեծ երկիրն ու ժողովուրդը։
Այնուամենայնիվ, չնայած այս օգնությանը, միայն մենք կարող ենք հասնել վերջնական հաղթանակի։ Իրանի ժողովուրդն է, որ կավարտի այս վերջնական մարտը։ Փողոց վերադառնալու ժամանակը մոտ է։ Հիմա, երբ Իսլամական Հանրապետությունը կանգնած է փլուզման եզրին, իմ ուղերձը երկրի զինված ուժերին, ոստիկանությանը և անվտանգության ուժերին. դուք երդվել եք պաշտպանել Իրանը և Իրանի ժողովրդին, այլ ոչ թե Իսլամական Հանրապետությունը և նրա առաջնորդներին։
Ձեր պարտականությունն է պաշտպանել ժողովրդին, այլ ոչ թե ռեժիմին, որը մեր հայրենիքը պատանդ է վերցրել բռնաճնշումների և հանցագործության միջոցով։ Միացեք ժողովրդին և օգնեք ապահովել կայուն և անվտանգ անցումային շրջան։ Հակառակ դեպքում, դուք կխորտակվեք Խամենեիի և նրա ռեժիմի խորտակված նավի հետ միասին։
Եվ իմ ուղերձը Միացյալ Նահանգների նախագահ Թրամփին. Իրանի ազնիվ ժողովուրդը, չնայած ռեժիմի կողմից իրականացված դաժան բռնաճնշումներին և սպանություններին, քաջաբար դիմադրել է գրեթե երկու ամիս։ Հիմա ես խնդրում եմ ձեզ ցուցաբերել առավելագույն զգուշություն՝ պահպանեք քաղաքացիական անձանց և իմ հայրենակիցների կյանքը։
Իրանի ժողովուրդը Միացյալ Նահանգների և ազատ աշխարհի բնական դաշնակիցն է, և ես երբեք չեմ մոռանա ձեր աջակցությունը Իրանի ժամանակակից պատմության ամենադժվարին ժամանակահատվածում», – ասել է Փահլավին։