Դուբայ, Կատար, Բահրեյն․․․ Իրանը վերսկսել է հուժկու հարվածները
Sun, 01 Mar 2026 12:30:19 +0400
Իրանը հարվածներ է հասցրել Իրաքյան Քրդստանի մայրաքաղաք Էրբիլի օդանավակայանի մոտ գտնվող ամերիկյան ռազմաբազային, հայտնում է Fars լրատվական գործակալությունը։
Ըստ գործակալության՝ սա վերջին մի քանի ժամվա ընթացքում բազայի հարձակման երկրորդ դեպքն է։
Իրանը նաև նոր հարվածներ է հասցրել նաև Կատարի մայրաքաղաք Դոհային։ Կատարի Ներքին գործերի նախարարության տվյալներով՝ Դոհայի արդյունաբերական գոտում հրդեհ է բռնկվել քաղաքի վրայով իրանական հրթիռի խոցումից հետո։ Ականատեսները հայտնել են, որ քաղաքում լսվել է առնվազն 11 պայթյուն։
Բահրեյնի լրատվամիջոցները հայտնել են, որ հակաօդային պաշտպանության համակարգերը գիշերը արձագանքել են «թշնամական իրանական հրթիռային հարձակումներին»՝ խափանելով առնվազն 45 հրթիռ և ինը անօդաչու թռչող սարք։
Բահրեյնի Ներքին գործերի նախարարությունը հայտարարել է, որ Մանամա և Մուհարաք քաղաքներում երեք շենք վնասվել է «անօդաչու թռչող սարքերի հարձակումների և խոցված հրթիռից ընկնող բեկորների հետևանքով»։
Քաղաքացիական ավիացիայի վարչության բարձրաստիճան պաշտոնյայի խոսքով՝ Բահրեյնի միջազգային օդանավակայանի վրա անօդաչու թռչող սարքի հարվածը «աննշան նյութական կորուստներ» է պատճառել։
AFP-ի հաղորդմամբ՝ Դուբայում լսվել են նաև այլ պայթյուններ։ Մարտի 1-ի առավոտյան քաղաքը ցնցել էին մի շարք պայթյուններ: Ըստ Fars-ի՝ Իրանը նաև հարվածել է Դուբայում գտնվող ԿՀՎ-ի շտաբ-բնակարանին: Հրդեհվել է նաև Burj Al Arab հյուրանոցը։
ԱՄԷ-ն հարձակման է ենթարկվել նախորդ երեկոյան՝ փետրվարի 28-ին: Հրթիռի բեկորները ընկել են Դուբայի Պալմ Ջումեյրա թաղամասում, ինչի հետևանքով հրդեհ է բռնկվել Fairmont հյուրանոցում, որի հետևանքով վիրավորվել է չորս մարդ:
Աշխարհի ամենաբարձր շենքի՝ Բուրջ Խալիֆայի մոտ անօդաչու թռչող սարք է խփվել: Խփված անօդաչու թռչող սարքերի բեկորները նույնպես ընկել են բնակելի շենքերի վրա: Տեղական իշխանությունների տվյալներով՝ վիրավորվել է երկու մարդ: