Հիմա որքան ու ինչ վարկ են վերցնում
Tue, 03 Mar 2026 12:30:16 +0400
Հայաստանը ավելի քան 70 միլիոն եվրոյի վարկ կստանա Համաշխարհային բանկից՝ ջրամատակարարման և ոռոգման համակարգերի բարելավման նպատակով։ Այս մասին Ազգային ժողովում հայտարարել է Տարածքային կառավարման և ենթակառուցվածքների նախարարության Ջրային կոմիտեի նախագահ Արամազդ Ղալամքարյանը՝ ներկայացնելով «Հայաստանի ջրամատակարարման և ոռոգման բարելավման ծրագիր. Փուլ 1» վարկային համաձայնագրի վավերացման նախագիծը։
Նրա խոսքով՝ ֆինանսական միջոցները կուղղվեն ջրամատակարարման և ոռոգման ծառայությունների որակի բարձրացմանը։ Փաստաթղթի հիմնավորման համաձայն՝ 2025 թվականի սեպտեմբերի 11-ին և 18-ին Հայաստանի Հանրապետությունն ու Վերակառուցման և զարգացման միջազգային բանկը ստորագրել են համապատասխան վարկային համաձայնագիրը։ Դրանով նախատեսվում է, որ Բանկը Հայաստանին կտրամադրի 70,4 միլիոն եվրո՝ ծրագրի իրականացման համար։
Կառավարությունը պարտավորվել է համաֆինանսավորել ծրագրի շրջանակում առաջացող հարկերը, տուրքերը, գործառնական և այլ այնպիսի ծախսերը, որոնք չեն կարող ծածկվել վարկային միջոցներով։
Վարկային համաձայնագրի ուժի մեջ մտնելու վերջնաժամկետը սահմանված է ստորագրումից հետո 180 օրվա ընթացքում, իսկ ծրագրի իրականացման տևողությունը կկազմի հինգ տարի՝ սկսած ուժի մեջ մտնելու պահից։ Համաֆինանսավորման համաձայնագրի ուժի մեջ մտնելու ամսաթիվ է սահմանվել 2026 թվականի մարտի 31-ը։