Առաջիկա ամիսները լինելու են շատ լարված․ ԱԱԾ նախկին տնօրեն

Sat, 07 Mar 2026 16:45:00 +0400

Երեկ երեկոյան երիտասարդ տղամարդը Մոլոտովի կոկտեյլ է շպրտել Երևանում ԱԱԾ շենքի ուղղությամբ և փախուստի չի դիմել: Կանգնել ու նայել է, թե ինչպես է այրվում ԱԱԾ-ի դարպասին հարակից հատածը:

«Հրապարակը» միջադեպի հետ կապված հարցեր ուղղեց ԱԱԾ նախկին տնօրեն Միքայել Համբարձումյանին:

-Պրն Համբարձումյան, ՀՀ երրորդ հանրապետության պատմության մեջ եղե՞լ է մի դեպք, երբ քաղաքացին իր վերաբերմունքն արտահայտի ԱԱԾ վարչության գլխավոր մուտքի մոտ Մոլոտովի կոկտեյլ շպրտելով ու կանգնել` նայելով:

– Ես չեմ մտաբերում նման արտառոց, հանդուգն դեպք: Իհարկե, եղել են անհամեմատ ավելի քիչ վտանգավորության միջադեպեր, որոնք կրել են ավելի շատ կենցաղային բնույթի բողոքի ձևեր: Մի բան պարզ է, որ այս անձը գործել է բացահայտ, հանրորեն խիստ վտանգավոր եղանակով, ունեցել է նպատակ ու ասելիք՝ պետության, մասնավորապես՝ ԱԱԾ-ի դեմ:

– Ի՞նչ հետևություններ պետք է անել այս միջադեպից, ի՞նչ խնդիրների մասին է խոսում այս միջադեպը:

– ⁠Այս հարցին հստակ պատասխանելու համար պետք է իմանալ, հասկանալ, թե անձն ինչ շարժառիթով է գնացել նման համարձակ, աղաղակող քայլի: Վստահ եմ, նա քննությանը կհայտնի իր քայլի պատճառը: Ակնհայտ է, որ նա չի վախեցել բացահայտվելուց, բռնվելուց, հետևաբար՝ ասելիք ունի: Միայն դրանից հետո կարելի է հետևությունների հանգել, ու, եթե քայլն ունեցել է օբյեկտիվ պատճառներ, պետք է վերացնել դրանք՝ հետագայում նման դեպքերից խուսափելու համար:

– Քաղաքացու կողմից նման արարքը ինչպե՞ս եք մեկնաբանում, սա կարո՞ղ է լինել բողոքի արտահայտման ձև ԱԱԾ-ի վարած քաղաքականության դեմ:

– ⁠Պետք է պարզել պատճառը, բողոքը կարող է ունենալ, թե անձնական, թե կենցաղային, և թե քաղաքական դրդապատճառներ: Ես բազմիցս եմ ասել, որ երկրում առկա այս թշնամական մթնոլորտը, անարդարությունը, որևէ լավ բանի չի բերելու: Իշխանությունը հստակ պետք է գիտակցի, որ քրեական վարույթներով և ճնշումներով երկիր ղեկավարել, առաջ մղել չի կարելի, հատկապես մեր նման փոքր երկրում, որտեղ տեսանելի է ամեն ինչ: Չեմ բացառում նաև, որ անձի դժգոհությունը կարող է կապված լինել հենց ԱԱԾ գործունեության հետ, հաշվի առնելով մեզ հայտնի փաստերը: Չմոռանանք նաև, որ վերջին շրջանում ԱԱԾ-ից առանց հիմնավորման, պատճառի եղել են բազմաթիվ կադրային ազատումներ, որը ևս կարող է նման քայլի, բողոքի հանգեցնել:

-Հնարավո՞ր է գործ ունենք սադրանքի հետ, որի միջոցով հետագայում ընտրություններին ընդառաջ, իշխանությունները կարող են այս արարքի պատճառաբանությամբ թիրախավորել ընդդիմադիր ուժերին:

-Սադրանք է, թե ոչ, դժվար է ասելը քայլի շարժառիթը չիմանալով, ժամանակը ցույց կտա, մեկ բան պարզ է, որ առաջիկա ամիսները լինելու են խիստ լարված ու վտանգավոր: