Մարդիկ արդեն կատարել են իրենց ընտրությունը
Wed, 11 Mar 2026 15:45:42 +0400
Կարելի է երկար նայել երեք բանի․
Ինչպես է այրվում կրակը։
Ինչպես է հոսում գետը։
Ինչպես է Հայաստանի իշխանությունը ջղագրգիռ նոպայի մեջ ցնցվում։
Իրականում այս բոլոր նախընտրական «պարերը թմբուկի շուրջ» և Հայաստանի գործող իշխանության լիովին աննորմալ և ծիծաղելի հնարքներն ու ճիգերը ցույց են տալիս միայն մեկ բան․ իշխանությունը ջղաձգված ելք է փնտրում այն ընտրական թակարդից, որտեղ, ըստ էության, շանսեր չունի։
Անկասկած, ինչպես ցանկացած մաշված ու ներսից փտած համակարգ, ներկայիս իշխանական խումբը մի ծայրահեղությունից մյուսն է նետվում՝ փորձելով կրկին գտնել «ճանապարհ դեպի ընտրողների սրտերը»։
Բայց չի ստացվում։ Չեն օգնում ո՛չ կենսաթոշակների բարձրացումը, ո՛չ էլեկտրամոբիլների հարկի նվազեցումը, ո՛չ էլ շուտով և շատ արագ «ԵՄ իբր մտնելու» խոստումները (սա հատկապես ծիծաղելի թեզ է)։ Չեն օգնում նույնիսկ սուպեր -հիպեր-մեգա ինքնավստահ հայտարարությունները, թե իբր իշխանությունը մարդկանց կողմից այնքան մեծ սեր է վայելում, որ առանց դժվարության կհաղթի ընտրություններում։
Լո՞ւրջ: Իհարկե` ոչ։ Եվ իշխանությունն էլ դա լավ գիտի։ Հենց դրանով է պայմանավորված նրանց գրեթե ամենօրյա հիստերիան՝ բացարձակ անհեթեթ նարատիվների շուրջ։
Մարդիկ արդեն բացահայտ ծաղրում են իշխանությունների հայտարարություններն այն մասին, թե իբր ընդդիմությունը պատրաստում է «Գյումրի-2» ինչ-որ «խորհրդավոր սցենար»։ Իսկ Նոյյան տապանի գաղափարի շուրջ անհաջող, անհեթեթ և ապուշ «հումորները» մարդկանց մոտ առաջացնում են բացահայտ զայրույթ ու հակակրանք։
Իշխանության բարձրագույն ներկայացուցիչները շրջում են երկրի քաղաքներով ու գյուղերով և չանա-չանա վիճում մարդկանց հետ, որովհետև մարդիկ պարզապես ասում են ճշմարտությունը։
Իհարկե, իշխանության ներկայացուցիչները մինչև վերջ կպայքարեն իրենց կաբինետների, պարգևավճարների, հարմարավետ գործուղումների, պրոթուրքական «կայֆերի» և «թավշյա կյանքի» մնացած հաճույքների համար, ու չկասկածեք` գժի պես կռիվ են տալու հայերի դեմ, սա անկասկած։
Բայց դա արդեն էական չէ։
Էականն այն է, որ անխուսափելիորեն մոտենում է ընտրությունների ժամանակը։ Եվ որքան էլ մարդկանց վախեցնեն, որքան էլ ստեն, որքան էլ փորձեն գնել նրանց… մարդիկ արդեն կատարել են իրենց ընտրությունը։
Եվ հենց դա է ամենից շատ վախեցնում իշխանությանը։