ԿԸՀ պարզաբանումը՝ «Ուժեղ Հայաստանի» գրանցման-չգրանցման խոսակցությունների հետ կապված

Wed, 11 Mar 2026 16:38:00 +0400

Հայաստանի Կենտրոնական ընտրական հանձնաժողովը (ԿԸՀ) կարող է հրաժարվել քաղաքական ուժի գրանցումից միայն այն դեպքում, եթե դրա մասին հենց այդ քաղաքական ուժը դիմի։ Այս մասին մարտի 11-ին լրագրողների հետ հանդիպման ժամանակ հայտարարել է ԿԸՀ նախագահ Վահագն Հովակիմյանը՝ պատասխանելով ռուսաստանաբնակ գործարար, «Տաշիր» ընկերությունների խմբի սեփականատեր Սամվել Կարապետյանի «Ուժեղ Հայաստան» կուսակցության գրանցման շուրջ հնարավոր խնդիրների մասին հարցին։

Հովակիմյանը նշել է, որ Հայաստանի օրենսդրությունը հստակ սահմանում է, թե ինչ փաստաթղթեր պետք է ներկայացնի կուսակցությունը գրանցման համար, և եթե ամբողջ փաթեթը ապահովված է, գրանցումը պարտադիր է։ «Եթե փաստաթղթերը կիսատ են և 48 ժամվա ընթացքում պակասը չի լրացվում, այդ դեպքում կարող է դրվել չգրանցման հարցը քվեարկության», – հավելել է նա։

Նա նաև անդրադարձել է «Հանրապետություն» կուսակցության այն մեղադրանքներին, թե «Ուժեղ Հայաստան» կուսակցությունը կարող է խախտել գրանցման կանոնները՝ ստանալով արտաքին ֆինանսավորում։ Հովակիմյանը նշել է, որ քաղաքական գործիչները կարող են իրար մեղադրել կամ կոչ անել կուսակցությունների գրանցում արգելել, բայց դա չի ազդում ԿԸՀ-ի որոշումների վրա։

Նա ընդգծել է, որ ընտրություններին մասնակցող քաղաքական ուժերի գրանցումը ամբողջությամբ կարգավորվում է Ընտրական օրենսգրքով: