Գրեթե Երևանի չափ տարածք Ադրբեջանի վերահսկողության ներքո է

Thu, 12 Mar 2026 13:23:49 +0400

Գրել էինք, որ «Միասնության թևեր» քաղաքական նախաձեռնության անդամները մարտի 12-ին ակցիա են անցկացրել ՀՀ կառավարության շենքի դիմաց։

«Միասնության թևեր» քաղաքական նախաձեռնության անդամ, պատմաբան Արեգ Սավգուլյանը խոսեց Հայաստանի սուվերենության և սահմանների պաշտպանության շուրջ ստեղծված իրավիճակի մասին։

Նա նշեց, որ պաշտոնապես 2021 թվականին ստեղծվել է ՀՀ և Ադրբեջանի միջև սահմանազատման հանձնաժողով, բայց զուգահեռ գործում է ստվերային հանձնաժողով, որը գաղտնի ամրապնդում է դիրքերը սահմանամերձ հատվածներում՝ հասարակությանը հայտնի չլինելով։

Սավգուլյանը ընդգծեց, որ եթե կառավարությունը չբարձրաձայնի այս գործընթացների մասին, դա տպավորություն է ստեղծում, որ տեղի ունեցող քայլերը պայմանավորված են։ Նա շեշտեց, որ Հայաստանի սուվերեն տարածքից մոտ 20,000 հեկտար այժմ վերահսկվում է Ադրբեջանի կողմից, ինչը համարժեք է Երևանի ամբողջ տարածքին։

Նրա խոսքով, այսօր Հայաստանի իշխանությունները կենտրոնացած են միայն վերընտրման և սեփական իշխանությունը պահպանելու վրա, իսկ իրական վտանգները հանրությանը չեն ներկայացվում։