Հորմուզի նեղուցի փակումը լուրջ խնդիրներ է առաջացրել
Tue, 17 Mar 2026 14:30:30 +0400
Հորմուզի նեղուցի փակումը հանգեցրել է պարարտանյութերի համաշխարհային արտահանման մոտ 50%-ի դադարեցման, ինչը կարող է մեծ վնաս հասցնել ցանքսի շրջանում և պարենային ճգնաժամ առաջացնել Եվրոպայում ու Ասիայում։ Այս մասին գրում է «Իզվեստիա» պարբերականը։
Մերձավոր Արևելքում հակամարտության սկսվելուց հետո ազոտական հավելումների գներն աճել են 30%-ով։ Ռուսաստանը, որին բաժին է ընկնում այս արտադրանքի համաշխարհային շուկայի շուրջ 20%-ը, կարող է ավելացնել արտահանման ծավալները։
Սահմանափակումներն առաջին հերթին հարվածել են Հնդկաստանին։ Կատարից հեղուկ բնական գազի մատակարարումները, որն ազոտական հավելումների արտադրության հիմնական հումքն է, փաստացի դադարել են։ Արդյունքում միզանյութ (կարբամիդ) արտադրող բազմաթիվ ձեռնարկություններ կա՛մ ամբողջությամբ կասեցրել են աշխատանքը, կա՛մ զգալիորեն նվազեցրել են ծավալները։
Փորձագետները նշում են, որ Հնդկաստանն ազոտական պարարտանյութերի խիստ կարիք ունի. հունիսին սկսվող ցանքսի նախաշեմին ներքին արտադրությունը նկատելիորեն կրճատվում է։ Ուսումնասիրության մեջ նաև նշվում է, որ երկրի բնակչությունը 1,4 միլիարդ է, և գյուղատնտեսության կախվածությունը պարարտանյութերից ուղղակիորեն հարվածում է պարենային անվտանգությանը։ Գոյություն ունեն բրնձի, ցորենի և այլ հիմնական մշակաբույսերի բերքատվության անկման և, որպես հետևանք, սննդամթերքի թանկացման լուրջ ռիսկեր։
Ստեղծված պայմաններում շուկան բախվում է գների կտրուկ բարձրացման և անկայունության ուժեղացման վտանգին։ Ամենախոցելին ազոտական և ֆոսֆորական հավելումների ոլորտներն են։ Լոգիստիկ սահմանափակումներն ուղղակիորեն ազդում են միզանյութի(ազոտական խմբի գլխավոր արտադրանքի) մատակարարումների վրա, ինչպես նաև նվազեցնում են ամոնիակի և ծծմբի հասանելիությունը, որոնք ֆոսֆորական պարարտանյութերի արտադրական շղթայի հիմնային բաղադրիչներն են։