Հորմուզի նեղուցի հարցը կքննարկեն ՄԱԿ ԱԽ-ում
Fri, 20 Mar 2026 21:30:19 +0400
Ֆրանսիայի նախագահ Էմանուել Մակրոնը չի բացառել, որ Հորմուզի նեղուցով անվտանգ, անխափան նավագնացության ապահովման հարցը կարող է քննարկվել ՄԱԿ Անվտանգության խորհրդի 5 մշտական անդամների շրջանակում։ Այս մասին նա ասել է Բրյուսելում նախօրեին տեղի ունեցած ԵՄ գագաթնաժողովի ավարտին՝ արդյունքների ամփոփման ժամանակ։ Ֆրանսիայի նախագահը շեշտել է, որ այս նախաձեռնությունն ինքն արդեն քննարկել է ՄԱԿ Գլխավոր քարտուղար Անտոնիու Գուտերեշի հետ։ «Ֆրանսիան մտադիր է ստուգել հիմնական գործընկերների արձագանքեը, ներառյալ նաեւ ՄԱԿ ԱԽ հինգ մշտական անդամներինը՝ ՄԱԿ շրջանակում Հորմուզի նեղուցի հարցով հատուկ մեխանիզմ ստեղծելու մեր պլանների առնչությամբ»,- ասել է Ֆրանսիայի նախագահը։
Նա հավելել է, որ իր այս նախաձեռնության մասին իրազեկել է թե եվրոպացի մյուս գործընկերներին, թե Հնդկաստանի վարչապետ Նարենդրա Մոդիին։ Առաջիկա օրերին, ըստ Մակրոնի պարզ կդառնա, թե արդյոք այդ նախաձեռնությունը կունենա հեռանկար իրականություն դառնալու, թե ոչ։